NANGHINAOT si Cebuana junior triathlete Moira Frances Erediano nga makakombati gihapon siya og insakto bisan mosaka na siya og kategoriya sa iyang pagsalmot sa Subic National Age Group (NAGT) Junior Elite Sprint karong Enero 26, 2020 sa Subic Freeport Zone.
Mao kini ang labing unang higayon nga ang garbo sa Lapu-Lapu City moapil sa sprint category sa NAGT race nga katambayayong sa Triathlon Association of the Philippines, ang national governing body sa triathlon.
Ang ninth-grader sa Sacred HeartSchool-Ateneo de Cebu mikombati sa super sprint distance sa 2019 NAGT season.
Ning higayuna, gilaumang mas malisod ang sagubangon ni Erediano sa junior sprint nga gilangkuban og 750-meter swim, 20K bike ug 5K run.
Sa miaging tuig, si Erediano misalmot sa nagkadaiyang mga lumba nga tipik sa Go For Gold Triathlon Series Championship diin nadaog niya ang girls’ overall title human siya nakahakot sa series og 100 championship points.
Gipasabot sa amahan ni Erediano nga si Fritz nga gibuhat niya ang tanan kaabag ang Ateneo de Cebu ug hasta sicoach Andoy Remolino aron magiyahan og insakto ang iyang anak. (RSC, ESL)