NAGKAHAYAG ang paglaom sa Cebu-Casino Ethyl Alcohol nga makakumpayot sa inilugay og puwesto sa nagkaduol nga playoffs human sa ilang makutas nga kadaugan batok sa Nueva Ecija Rice Vanguards, 77-73, niadtong Lunes sa gabii, Enero 20, 2020 sa 2019-20 Chooks-to-Go Maharlika Pilipinas Basketball League (MPBL) Lakan Season sa Strike Gymnasium sa Bacoor.
Ang Cebu ningsaka sa 12-13 nga rekord nga nagpahiluna kanila sa ikasiyam nga dapit sa Southern Conference diin sikit nilang gisundan ang Bicol Volcanoes, nga naa sa ikawalo dala ang 13-13 nga baraha.
Ang mopatigbabaw lang nga walo sa Southern Conference ug hasta sa Northern Conference mao ang makasulod sa playoffs.
Ang Rice Vanguards nahagbong sa 8-18 nga rekord, ika-12 sa Northern Conference.
Kanunay man tuod naglabaw ang Cebu sa kinatibuk-ang duwa apan nakasugat kini og grabeng pagpanghudlat gikan sa Rice Vanguards hilabi na sa hinapos nga bahin.
Sunodsunod nga puntos ang gimugna nila ni Tonino Gonzaga ug Justine Arana aron pasikiton ang Rice Vanguards, 73-75, sa katapusang 33.4 segundos.
Hinuon human niini, ang beteranong pointguard sa Cebu nga si Harold Cortes inanay nga mihurot sa oras hinungdan nga naahat pag-foul ang iyang kaparang nga si Jai Reyes sa nabiling 11.2 segundos.
Napasulod ni Cortes ang iyang duha ka krusyal nga freethrows aron ablihan og dako ang pultahan sa Cebu paingon sa kadaugan.
Sa return play, pakyas ang Rice Vanguards pagmugna og puntos.
“Ipinasok ko yung defensive players ko tapos we switched everything kaya di sila nakaattempt,” matod ni Cebu coach Noynoy Falcasantos sa katapusang posisyon sa bola.
Ang kanhi University of the Visayas (UV) Green Lancers forward Rhaffy Octobre maoy nangulo sa Cebu pinaagi sa pagpupo og 22 puntos samtang nidugang og 11 puntos sila si John Saycon ug Nichole Ubalde.
Si Reyes maoy nangulo sa Nueva Ecija pinaagi sa iyang 14 puntos.
Puntos matag usa
Cebu (77) - Octobre 22, Saycon 11, Ubalde 11, Viloria 10, Lao 9, Cortes 8, Nuñez 4, McAloney 2
Nueva Ecija (73) - Reyes 14, Monte 11, Gonzaga 10, Martinez 10, Sabellina 7, Arana 6, Sarao 5, De Leon 4, Aquino 4, Dela Cruz 2. (JNP, ESL)