ORMOC City, Leyte -Dakong hagit karon sa Department of Public Works and Highways (DPWH) sa kwatro distrito sa Leyte ang pagpatuman sa dagkong mga proyekto.
Matod ni Engr. Lino Francisco Gonzales, labaw sa DPWH 4th LED, karong tuiga ang labing dako nga pundo nga nadawat sa ilang buhatan.
“We have 76 projects for 2020 and this is a very challenging year for us,” matod ni Gonzales sa mga tigbalita.
Miabot sa P2.8 bilyones ang pundo sa mga proyekto karong 2020 nga aprobado ubos sa General Appropriations Act.
Matod ni Gonzales posible nga moabot pa ni sa P3 bilyones kapin kung mo sud na sab ang ubang pundo gikan sa Department of Education ug ubang ahensya
Nag-una sa dagkong mga proyekto ang katukuran sa Ormoc City Convention Center dapit sa New Ormoc City Hall.
Ang pagtukod sa Convention Center bahinon sa duha ka phase. Lakip usab niini ang pagtukod sa bag-o nga Ormoc City Disaster Risk Reduction and Management Operations Building likod sa Office of Senior Citizens Affairs.
Duha kini ka andana ug dunay mga lawak alang sa mga ekipo ug monitoring ug ubang mga gamit sa CDRRMO diin duna kini project cost nga P20 milyones.
Matod ni Gonzales nga sa Pebrero o Marso masugdan ang pagtukod sa mga proyekto.
Sa ilang local projects, nag-una niini ang water management facility sa Kananga, Leyte nga gigahinan og P50 milyones nga pundo ni Kongresista Lucy Torres - Gomez.
Matod ni Mayor Matt Torres, sugdan na nila ang feasibility study sa proyekto.
Iyang gisiguro nga di na masinati sa ubang barangay ang pagkaputol sa supply sa tubig.
Itukod usab sa DPWH ang bag-o nga building sa Ormoc City Police Office sa Barangay Camp Downes.
Padayun usab ang mga road concreting ug pag-aspalto sa mga karsada.
Lakip usab ang pagpalapad sa mga tulay sa distrito aron mamahimo nga hapsay ang biyahe sa mga motorista. (JKDP)