MINNESOTA, USA – NIKATAP karon sa Amerika nga adunay nadakpan ang Top Rank officials nga duha ka mga Pinoy (dili kining inyong tigbalita) nga nanglimbong aron makasulod ug makasaksi sa linawas nga away nila ni WBO welterweight ug pound-for-pound king Manny “Pacman” Pacquiao batok kang Joshua “The Grand Master” Clottey niadtong Marso 13 sa Dallas Cowboys Stadium sa Arlington, Texas, USA.

Human sa away, ang Top Rank officials nipahibalo sa mga tigbalita nga may nasakpan sila’nga duha ka mga Pinoy nga misulod sa 100,000 seating capacity stadium gamit ang peke nga accreditation temporary passes.

Click here for Election 2010 updates

Gipasabot sa Top Rank nga adunay unom ka Filipino journalists silang giaprubahan nga nagpa-accredit nga nagpailang mga sakop sa philboxing.com, ang sikat ug inilang boxing website sa Pilipinas.

Ang pasangil, matod pa, nga sakop ra sa Team Pacman ang namaligya og temporary passes sa kantidad nga $150. Ang maong passes alang ra unta sa lehitimong mga sakop sa media nga mo-cover sa away.

Apan matod pa nga walay kalibutan niining tanan ang People’s Champion hinungdan nga hangtod ning pagbalita wala pay komento nga gipagawas ang kampo sa Pambansang Kamao.

Samtang ang Philboxing.com official usab nga wala lang una magpaila niingon nga wala silay kasayuran kinsa kining unom nga nagpaila’ng ilang sakop sa Team Pacman nga nakakuha og accreditation gikan sa Top Rank.

Sa laing bahin gikataho nga minus ra ang ningsaksi sa gihimong after-fight-party concert ni Pacquiao Manny kay gihimo’ng negosyo ang maong kalihukan.

Nasayran sa Sun.Star Superbalita ug dyRF Radyo Fuerza 1215 khz nga gipamaligya sa tag $100 ang matag tiket.

Nikomentaryo ang pipila ka sports analysts nga panahon na alang sa pag professionalize sa Team Pacquiao pinaagi sa paghimo’g revamp sa tibuok team aron hulmahon ang bag-ong “Dream Team” nga dili kuwestiyonableng mga tawo. (Daniel Quindao Guden-correspondent)