POSIBLENG may kalambigitan sa illegal nga drugas ang pagpusil patay sa usa ka 40 anyos nga lalake sa sudlonon nga bahin sa back old Pepsi, Sityo San Vicente, Barangay Mabolo, Siyudad sa Sugbo.
Apan di pa matumbok sa kapulisan ang tino nga kalambigitan sa illegal drugs sa biktima kay way nihatag og mga pamahayag sa mga kabanay ug mga silingan.
Wa pa silay nakuhang imbestigasyon bisan dunay nakakita sa pagpatay.
Si Police Master Sergeant Enrique Manulong sa Mabolo Police Station, kinsa naghawid sa kaso, niingon nga posibleng may kalambigitan sa illegal nga drugas ang pagpusil patay kang Richelieu Tudtud, 40, kinsa nag-inusarang nagpuyo sa ilang balay.
Matod pa ni pa ni Manulong nga ang gipuy-an ni Tudtud gipanag-iya sa iyang amahan, kinsa patay na.
“Dunay nakita namo nga daghan nga drug paraphernalia man gud sa iyang kwarto mao to nga akong palawman pa ang pagkuha og imbestigastigasyon,” matod ni Manulong.
Gitin-aw ni Manulong nga sa pagkakaron di pa nila matumbok kon giunsa pagkalambigit ni Tudtud sa drugas.
“Dili man gud mo-cooperate ang mga paryente. Bisan igsuon sa biktima wala kabalo, pulos ambot lang mao nang wala gyud mi makuha,”dugang ni Manulong.
Si Tudtud kinsa paingon unta sa ilang balay gisundan sa gunman ug dihang napusilan na, nidagan bisan naigo na.
Apan giingong gigukod pa kini sa gunman sulod sa ilang balay. Sa dihang misaka sa ikaduhang andana, nabulasot si Tudtud ug sa ubos nahagba.
Kini subay sa mga istorya sa mga silingan sa biktima nga dihang mohatag og impormasyon, ginagmay lang nga mga tubag.
Patay na siyang naabtan sa kapulisan nga mingresponde sa alarma. (BBT)