NANGHINAOT ang kaparian sa Basilica Minore del Santo Niño nga masabtan unta sa tanan nga ilang gihan-ay daan base sa schedule ang tanang mga kalihokan sa kapistahan sa Señor Santo Niño, ilabi na sa Solemn Foot Procession niadtong Sabado, Enero 18, 2020.
Mao kini ang pamahayag sa kaparian agi og reaksyon sa hangyo ni Cebu City Mayor Edgardo Labella nga di langayon ang pagsugod sa prosesyon aron malikayan nga dunay makuyapan.
Dunay mga tawo nga nakuyapan tungod sa kainit.
Matod sa Philippine Atmospheric Geophysical Atmospheric Geophysical Astronomical Services Administrastion (Pagasa) nga ang natala nila nga temperatura niadtong adlawa anaa sa minimum nga 26 degrees Celsius ngadto sa kinatas-an nga 31.9 degrees Celsius.
Sigon ni Fr. Ric Anthony Reyes, secretariat head sa 455th Fiesta Señor, nga wa usab sila magkuwang sa koordinasyon.
“Hinaot unta nga masabtan sa tanan, ilabi na sa atong talahurong mayor, nga naay planning, consultation ug presentation niini usa nato kini gipatuman sa atong tinuig nga pagsaulog sa fiesta,” saysay niya.
Iya usab giklaro nga di tinuod nga nairog ang prosisyon ug nigawas ang carozza sa Santo Niño ala 1:45 na sa hapon kundi anaa sa oras nga 1:06 sa hapon human nila gisusi ang ilang video recordings.
Dugang niya nga di usab nila mahimo nga sayuhon og pagpagawas ang imahen ni Sr. Santo Niño tungod kay gawas nga mao na kini ang naandan nga oras, aduna sad kini laing mga kalihokan sama sa fluvial procession ug uban pa nga kasagaran mahuman tanan sa alas 11 sa udto.
Apan padayon gihapon sila sa bukas nga linya sa komunikasyon tali sa Cebu City Hall ilabi na sa panahon sa pagpahigayon sa dagko nga pista sa Sugbo.
“Mao na nga among gikaguol kining observations nga dili takdo sa among assessment. Wala gayod kami nagkulang, base sa initial assessment which are nonetheless based on consultative dialogs and factual/scientific evidences from agencies like our police and other partners,” saysay ni Reyes.
Dungag niya nga ang Solemn Foot Procession ug ang lain pang mga relihiyosong kalihokan sa Fiesta Señor karong tuiga nahimo sa saktong oras, malinawon, organisado ug labi na makahuloganon ang pagpahigayon.