KAPIN sa usa ka kilo nga shabu ang nasakmit sa mga sakop sa Drug Enforcement Unit sa Consolacion Police Station niadtong Lunes, Enero 20 sa Sityo Bangkerohan, Barangay Tayud, Consolacion.
Miresulta sa pagkasikop sa unom ka mga tao ug pagkasakmit sa balor kapin P7 milyones nga kantidad sa shabu nga mga binulto lakip na sa usa ka kilo nga wala pa ma repack.
Si PMaj.Verniño Noserale, hepe sa Consolacion Police mi-ila sa ilang mga dinakpan nga sila Jo-ann Calinpon Sanchez 42, taga- Barangay T.Padilla, Cebu City ug live-in partner nga si RJ Jazon Paulin Jerosalem 28, Barangay Lorega San Miguel, Cebu City.
Nasayran nga ang duha nag-abang ug kwarto sa Sityo Bangkerohan, Barangay Tayud.
Samtang laing upat pa ang nadakpan nga gihulagway ni Noserale nga mi order og drugas gikan sa maong mag live-in.
Ang upat mao sila si Jonaly Bemtazal, 27, taga - Barangay Sun-ok, Cordova; Jennifer Flores, 21; Baby Beldosola 25; ug Helen Cuevas 52, pulos molopyo sa Barangay Lorega San Miguel, siyudad sa Sugbo.
Matud pa ni Noserale nga nga kapin sa buwan nila nga gimonitor ang mga kalihukan sa manag live-in.
Nasuta nga dili magpataka og baligya ang duruha gawas lang ngadto sa ilang mga suki na nga mamalitay og shabu.
Dili sab sila mobaligya og ginagmay lang.
“Gikan sa five grams pataas mao na ang ilang hatagan pero ug sachet lang ang imong paliton dili ka kapalit,” tug-an sa opisyal.
Samtang gikonsiderar sa Consolacion Police Station sila si Sanchez ug Jerosalem nga nalakip sa Provincial High Value Target. (BBT)