NIPALABANG og resolusyon ang Association of Barangay Council (ABC) sa Talisay City atol sa sesyon sa konseho sa dakbayan nga mihangyo nga mapun-an ang traffic lights ug pedestrian lane sa mga dapit nga nagkinahanglan.
Si ABC president Josefina Consial nipresentar sa maong resolusyon kagahapon, Enero 21 diin ang mga barangay kapitan maoy mo-ila sa mga dapit sa iyang hurisdiksiyon nga angayang butangan og traffic lights ug pedestrian lane.
Matod pa ni Consial nga nakita nila ang kamahinungdanon sa maong kahimanan ilabi na nga nagkadaghan na ang mga sakyanan o motorista.
Samtang si Jonathan Tumulak, traffic czar sa Talisay City ang nagkanayon nga dako og tabang ang sugyot ni Consial sa tinguhang pagmenos o pagpakgang sa aksidente sa kalsada.
Apan gipasabot sa opisyal nga mataud-tauran kini sa pagpatuman ilabi na nga taas taas nga proseso ang agian, ilabi na nga nagkinahanglan kini og dako-dako nga budget.
Ang abag sa mga tanod ug ubang sakop sa force multipliers nakahupay sa kahuot sa trapiko sa ilang area.
Kahinumduman nga aduna nay 89 ka kapitan, konsehal ug mga tanod ang na-deputize na sa City of Talisay Traffic Operations Development Authority (CT-TODA) ug madungagan pa kini karong Pebrero. (FMD)