DILI na unya lisud alang sa mga kabus nga taga-kuwatro ug sixto distrito sa lalawigan sa Sugbo sa ilang pagpatambal sa Vicente Sotto Memorial Medical Center (VSMMC) ug Eversley Child Sanitarium and General Hospital, Barangay Jagobiao, Mandaue City.
Sa dihang gilagdaan na sa mga kadagkuan sa naasoyng mga tambalanan ang Memorandum of Agreement (MOA) tali ni 6th District Congresswoman Emmarie "Lolypop" Ouano-Dizon ug 4th District Congresswoman Janice Salimbangon.
Nalatid sa MOA nga makapahimulos ang mga konstituenti sa sixto ug ika-upat nga distrito sa lalawigan sa Sugbo sa medical assistance nga ihatag ni Dizon ug Salimbangon ubos sa Medical Assistance for Indigent Patients Program (MAIPP) sa Department of Health DOH.
Ubos sa MOA adunay moabot nga P7.5 Million nga gitaganang pundo si Dizon sa VSMMMC ug P3.5 Million sa Eversley nga mahimong magamit sa mga taga sixth district.
Ang naasoyng pundo magamit nga bayad alang sa hospital bill, laboratory fees ug ubang kinahangalanong serbisyo gikan sa tambalanan.
Adunay P50,000 nga budget limit nga mahimong ihatag sa matag pasyente apan mahimo kining pa-umentohan nga mag-agad sa panginahanglanon, pasabot ni Dizon.
Samtang ang out-patient mahimo usab mga mataga-an og P5,000 nga budget.
Giklaro ni Dizon nga walay bulok politika ang naasoyng programa kay si bisan kinsa mahimong ang makapahimulos sa higayon nga konstituente sa 6th district.
Usa sa rekisito nga pangayuon mao ang certificate gikan sa Department of Social Welfare and Development DSWD nga magmatuod nga sila usa ka "indigent" kon kabus.
Si Salimbangon sa iyang bahin, mibutyag nga moabot sa P4 milyones usab ang gitagana niyang pundo sa VSMMC ug P1 milyon sa Eversley nga gitagan alang sa taga 4th district. (GCM)