MAKAPADAYON sa ilang pagpamasahero ang mga motorcycle taxi (Angkas ug habal-habal) human gibakwi sa Technical Working Group (TWG) sa Department of Transportation (DOTr) ang na-una nilang pahibawo nga undangon na ang pilot run niini kagahapon, Enero 21.
Gipahibawo ni Antonio Gardiola, chairman sa grupo sa motorcycle taxi nga nahinabi sa CNN Philippines nga gitun-an na karon sa tinguhang mamahimong legal ang ilang operasyon..
“Itutuloy po natin ‘yan, but then we will come up with guidelines, we will talk to the providers with guidance of the Transport Secretary,” asoy ni Gardiola human nga nakahukom ang Senado nga padayunon ang paghimo og patuon sa maong transportation mode.
Sa gihimong public hearing, giawhag ni Senadora Grace Poe ang TWG nga ipadayon ang pilot run sa maong mga motorcycle taxi, aron nga ang Senado makakuha ug saktong datos sa paghimo sa husto nga balaod nga nag-regulate sa maong matang sa public transportation sa nasud.
Ang mga mitambong sa maong public hearing mao sila si; Senator Ralph Recto, Sherwin Gatchalian, Christopher Lawrence Go, Imee Marcos, Joel Villanueva, Aquilino ‘Koko’ Pimentel III, ug Ronald ‘Bato’ Dela Rosa.
Samtang si George Royeca, Angkas Chief Transportation nagkanayon nga padayon gihapon sila nga makig-alayon sa kagamhanan.
“In spite all of these, nandito pa rin kami na gustong makipagtulungan. We are still committed to working with the government to build a better system,” sumala pa ni Royeca.
Sa susamang kalambuan, usa ka Angkas drayber kinsa nagdumili sa pagpa-ila ang mipadayag og kabalaka sa higayon nga undangon ang operasyon sa motorcycle taxi sa ilang pagpamasahero.
Ilabi na nga ang mao niyang panginabuhian maoy gisaligan sa iyang pamilya. (JCT)