SUPERBALITA CEBU

DOH: 5-anyos dunay Coronavirus

GIKOMPIRMAR. Si Dr. Jaime Bernadas, regional director sa Department of Health (DOH) 7, mikompIrmar sa mga tigbalita nga usa ka wa pa mahibaw-Ing matang sa coronavirus ang mitakboy sa 5-anyos nga bata nga gikan sa Wuhan City, China ug naospital dinhi sa Dakbayan sa Sugbo. (Allan Cuizon)

GIKOMPIRMAR sa Department of Health (DOH) 7 director sa Central Visayas nga positibo sa corona virus ang 5-anyos nga batang lalake, apan gisuta pa kon unsa nga strain sa coronavirus.

Apan giklaro sa ni Dr. Jaime Bernadas, DOH 7 director, nga waay angay nga kahadlukan kay anaa na sa maayo nga panglawas ang bata.

Kasamtangan kini nga gibutang sa usa ka isolation room sa usa mga tambalanan sa Dakbayan sa Sugbo.

Gibutyag ni Bernadas nga Chinese national nga batang lalake ang niabot sa Sugbo nga gikan sa Wuhan, China niadtong Enero 12 sa alas 2 sa kaadlawon.

Aduna kini hilanat, pagpanakit sa tutunlan ug ubo.

Sa buntag sa maong adlaw sa pag-abot niini sa Sugbo, gipa-confine kini sa tambalanan ug dali usab napatambalan ug nakuhaan og laboratory samples.

“Positibo sa coronavirus pero dili pa nato ma-determine kon unsa nga strain. Ang sigurado lang dili siya MERS-Cov,(Middle East Respiratory Syndrome-related Coronavirus), dili siya SARS (Severe Acute Respiratory Syndrome-related Coronavirus). Dili pa sad nato ma-determine kon pareha ba siya sa strain nga naa didto sa Wuhan, busa gipadala na siya (sample) sa Australia kay wala pa tay confirmatory kon unsa toy strain. Naa na siyay RNA sequencing,” pagpasabot ni Bernadas atol sa interview kaniya Martes sa hapon, Enero 21.

Kuyog sa bata nga anaa sa isolation facility ang iyang inahan.

Ang inahan, matod ni Bernadas, wa nagpakita og sintomas sa bisan unsa nga sakit.

Lakip nga ilang gi-monitor ang kapin sa 12 ka mga tawo nga adunay contact sa bata, ilabi na ang mga medical personnel nga nag-atiman ug bisan na ang ubang mga pasahero nga nakadungan niini sa ilang flight.

Apan iyang giklaro nga way angay nga ikaalarma o ikahadlok kay anaa na sa stable kon naayo na ang bata.

Gipaabot nalang nila karon nga mag-negatibo na sa duha ka mosunod pa nga mga test.

Ang resulta sa lab sample nga gipadala sa Australia niadtong Dominggo, Enero 19, posibleng masuta Myerkules, Enero 22, o Huwebes, Enero 23.

Panagana

Isip precautionary measures, human sa pagbuto sa taho kalabot sa coronavirus 2019 nga niigo sa Wuhan, China niadtong Disyembre 31, 2019, Enero 10, 2020 pa lang ang Department of Health sa kaulohan nimando alang sa heightened alert sa himuon nga surveillance sa pagbantay sa mga pantalan ug airports.

“Nakig-alayon na usab sa local consulate, duna nay advisory ang Consulate sa China nga ila nang gi-discourage ang mga anaay problema sa panlawas nga mobiyahe. We assured sa ang atong kaigsuonan nga ang Bureau of Quarantine, ang department sa siyudad sa Sugbo ug province sa Cebu ug tanang lungsod, nga nagbantay kita kon si kinsa ang mga adunay problema o nagpakita og upper respiratory symptoms,” saysay ni Bernadas.

“Ato sad awhagon ang atong kaigsuonan, nga likayan nato ang magpaduol sa mga adunay giubo, sip-on, sigeg sneeze,or ikaw nga nakasinati sa symptoms, molikay nalang, mas maayo nga mag-wear ka protective mask, aron dili katakud,” dugang ni Bernadas.

Likayan usab ang pag-adto sa lugar nga adunay daghan tawo, o huot.

Paninguhaon sa matag usa nga magpabiling himsog uban ang kompleto nga pahuway sama sa walo ka oras nga tug sa usa ka adlaw, balanced diet ug likayan ang ma-stress, ilabi na sa mga diabetic, hypertension “kay mga contributory or aggravating circumstances kon masakit ta mao man ang mga current medical status.”

Bisan kon adunay isolation facility alang sa masuta nga aduna sa maong virus, gipaniguro usab nga adunay infection control measures aron di usab matakdan ang mga empleyado sa tambalanan.

Simtomas

Matod sa DOH nga kining coronavirus nga anaa kini sa pamilya sa mga virus gikan sa ordinaryo nga sip-on ngadto na seryuso nga impeksyon susama sa MERS-CoV ug SARS-CoV.

Sintomas niini mao ang hilanat, ubo, paglisod og ginhawa diin kasagaran rason sa pnuemonia, acute respiratory syndrome, kidney failure ug possible kini nga makamatay.

Base sa impormasyon nga nahipos ning mantalaan, naabot sa Sugbo ang bata uban sa iyang inahan niadtong Enero 12.

Gikan sa Wuhan province ang duha diin sa Guangdong airport aggikan aron makasulod sa Sugbo.

Tungod sa pagsuka sa bata, gidala kini sa inahan sa usa ka pribado nga tambalanan.

Dihang nahibawo ang tambalanan kon diin sila gikan, didto na nga nagkuha sila og tests ug gisumiter sa DOH-RITM.

Dihang nigawas ang tests nga nagpositibo ang bata sa wala pa masuta nga pancoronavirus, dali kining gi-quarantine sa DOH 7 niadtong Enero 18, Sabado.

Di kini ang unang kaso sa suspetsado nga coronavirus o mas naila nga 2019 novel coronavirus (2019-nCoV) sa nasod tungod kay gi-monitor na usab sa DOH kining tulo ka Chinese nationals nga nakasulod pinaagi sa Kalibo International Airport.

Gawas nga naka-heightened alert na ang mga tugpahanan ug pantalansa Central Visayas, naka-alerto na usab ang Bureau of Quarantine subay niining bag-ong mga kaso.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph