KINING gihimo ni Mayor Tomas Osmeña klaro ug tataw kaayo nga pagwari-wari o pag-usik-usik sa kuwarta sa kagamhanan sa dakbayan sa Sugbo. Nagtuo siguro siya na gumikan sa kadako sa pundo karon sa dakbayan gumikan sa halin sa South Road Properties (SRP) dili kini mahurot. Unya ra ba klaro usab kaayo nga iyang gigamit sa iyang pulitikanhong interes ang kuwarta sa mga magbubuhis.
Iyang gihatagan og tag P4 mil ang mga senior citizens, tag P2 mil ang mga disabled. Unya dakong allowance alang sa mga huwes nga mokabat ngadto sa P30 mil. Ang mga graduating nga mga tinun-an sa mga public high schools iya sab nga hatagan og tag P10 mil. Doblihon niya alang sa mga tinun-an sa kabukiran. Karon manghire na pud og P2 mil ka mga batan-on ang City Hall og mga volunteers alang sa summer jobs.
PAMALIT OG BOTO
Unsa may tumong ni Tomas niining iyang mga lakang? Personal ug pulitika? Kon tinud-anay nga naglantaw ang mayor sa kaayuhan ning maong sektor, nganong karon pa man kini niya gihimo? Diin man kini kaniadto? Gumikan ba lang kay karon nakakuwarta ang kagamhanan gumikan sa halin sa SRP. O gumikan kay milansar siya pagkakongresista?
Mao kini ang bentaha sa incumbent kay makagamit sa kuwarta sa lungsod. Dili sama sa challenger nga mokuot intawon sa ilang kaugalingon bulsa. Pero kadyot lang, prayoridad ba gyod ning maong mga lakang sa mayor? Daghan man gihapon diha nga mga kalsada bisan sa kinapusuran sa dakbayan ang wala maatiman.
Kining gihimo sa mayor klaro lang gyod nga pagwaldas sa kuwarta sa mga magbubuhis alang sa iyang kaugalingong interes. Pamalit nig boto ang iyang gihimo.
TABANGAN
Ubay-ubay ang nahimong biktima sa sunog sa barangay Subangdako sa dakbayan sa Mandaue. Makalolooy intawon ang nahimong biktima gumikan kay wala na sila tuguti sa tag-iya sa yuta nga makatukod og balik sa ilang pinuy-anan. Nagbarong-barong lang intawon sila.
Sus, morag gihikap ang akong kasing-kasing nga nagtan-aw sa ilang kahimtang pinaagi sa footage sa GMA 7 Balitang Bisdak.
Maayo unta og matabangan sila sa mga pulitiko diha sa Mandaue inay nga kanunay kana silang mag-away. Aw, bisan og pamulitika ang ilang intensisyon sa pagtabang basta ang importante atong matabangan ang mga biktima. Dili gyud na nato kalikayan nga sakyan sa mga pulitiko ang ilang makaloluoy nga kahimtang.
(bobby@sunstar.com.ph)