GIPASABOT ni Marinerong Pilipino Skippers head coach Yong Garcia nga pamilyar alang kaniya ang dinuwaan sa mga kanhi magduduwa sa Cebu Schools Athletic Foundation Inc. (CESAFI) nga sila si Darrell Shane Menina, Miguel Gastador ug Rendell Senining.
Matod ni Yong nga kini maoy hinungdan nga wala niya usiki ang kahigayunan dihang nakabaton siya’g oportunidad sa pagpili sa nangahisgutang mga magduduwa sa miaging 2020 Philippine Basketball Association (PBA) D-League Draft.
Ang Skippers mosuway pagpalambo sa ilang runner-up finish sa miaging season diin napilde sila sa BRT-Sumisip-St. Clare sa finals.
Asoy ni Garcia nga ang presensya sa bag-o ug batan-on niyang mga magduduwa makatabang og dako sa iyang mga beterano aron makalahutay sa pinaspasay nga klase sa duwa sa ilang mga kaparang nga pulos school-based.
Sa 12 ka partisipanteng teams, bugtong ang Marinerong Pilipino lang ang club-based team.
“Malaking tulong sa mga beterano ng Marinerong Pilipino ang mga young guys para makasabay kami sa running game ng mga school based team,” pasabot ni Garcia.
“Si (Darrell) Menina, nakita ko siya naglaro sa Mapua and nakikita ng Marinero coaching staff na makatulong siya sa team.”
Si Menina nahimong sakop sa CESAFI Mythical Five ubos sa kampo sa University of Cebu (UC) Webmasters.
Kabahin kang Gastador, si Garcia miingon: “We were looking for a slasher and stopper kaya namin na draft si (Miguel) Gastador.”
Matod ni Garcia nga iya sab gipili si Senining gumikan kay nagkinahanglan siya og natural pointguard ug nakauyon sab siya sa depensa niini.
Sa laing bahin, gitataw ni Garcia nga wala pa siya masayod kon dawaton ba’g balik sa management si ex-PBA Eloy Poligrates, kinsa natanggong sa bilangguan dinhi sa Sugbo gumikan sa pasangil nga pagpanagmal sa iyang kanhi uyab.
Gipagawas ra hinuon si Poligrates sa bilangguan gumikan kay wala’y saktong ebidensya nga magpamatuod sa pasangil sa iyang kanhi uyab.
“Sa case ni Eloy (Poligrates), wait ko pa decision ng management dahil dun sa naging problema niya last time,” matod ni Garcia. (JNP, ESL)