NAGKAGRABE ang sakit sa kasingkasing sa giilang divine master sa Philippine Benevolent Missionaries Association (PBMA) ug gipasanginlang maoy nipatay sa iyang asawa niadtong 2002.
Kini ang gibutyag sa doktor ni Ruben Ecleo Jr. nga si Dr. Roberto Anastacio sa Makati Medical Center atol sa hearing kagahapon kabahin sa gisang-at nga mosyon sa mga abogado sa namatayng si Alona Bacolod nga nag-awhag sa korte nga ikanselar ang gipakanaog nilang mando nga makapiyansa si Ecleo.
Matod ni Anastacio nga dihang gisusi niya ang kahimtang sa kasingkasing ni Ecleo niadtong 2004 aduna gyod kini sakit nga gitawag niyag “coronary artery disease.”
Iyang gitumbok nga dunay nga problema sa pagpitik sa iyang kasingkasing nga sama sa ubang mga doktor nga gipresentar na sa korte sama usab ang ilang nakit-an nga problema sa kasingkasing niini.