SUPERBALITA DAVAO

Arlan Arbois Jr. ika-5 Milo 42K

DAVAO. Ang Dabawenyong si Arlan Arbois Jr. mitapos sa ikalimang pwesto sa men's 42K event sa 42nd National Milo Marathon National Finals sa Tarlac City, Enero 19, 2020. (Team Malolos Fitness photo)

KUNG di lamang tungod sa giingong tawag sa panginahanglanon sa lawas, ang Rizal Memorial Colleges (RMC) trackster nga si Arlan Arbois Jr. makaabot unta sa top three sa men's 42K local category sa 42nd National Milo Marathon National Finals nga gihimo sa Tarlac City, Dominggo, Enero 19.

Nabutang siya sa ikalimang pwesto.

Ang 23 anyos nga si Arbois, nga nanguna sa men's 21K qualifying leg niadtong Oktubre 20, 2019 sa Davao City, mioras og 2:35:26 segundos.

Si Jerald Zabala, nga runner-up sa 41st edition sa Milo run, miposte sa oras nga 2:31:16, samtang si Richard Salano (2:31:17) nabutang sa ikaduha, Jeson Agravante (2:31:55) ikatulo ug Florendo Lapiz (2:35:02) ikaupat.

Ang Dabawenyo sab nga sila Joselito Dugos (2:38:03) ug 30th Southeast Asian (SEA) Games marathoner Anthony Nerza (2:42:08) mihuma sa ika-9 ug ika-10 nga pwesto.

Si Arbois, nga nahimugso sa Tupi, South Cotabato, namahayag, "Sabay na unta ko sa leading kaso naabtan kug kalibangun pag turning point namo mao to nag CR pako. Top three jud unta akung target."

Niya, ang pagkabutang niya sa ikalimang pwesto gika-surpresa pa niya.

Apan suma pa, dawat niya unsa man iyang gidangatan.

"Gina-isip nako Ma'am na dili lang masayang akung pag-prepare ug sa pag sacrifice, sa pag training nako, din kaso mao to ang natabo. Bisag fifth lang ko, mao ra may gihatag ni Lord sa akoa."

Ang fourth year Criminology student nga si Arbois, ikaduha sa upat ka anak nila Arlan Arbois Sr., nga nagtikad og mais ug gulay sa Tupi, South Cotabato, ug Genalyn, nga may gamay'ng tindahan.

Siya midaug na sab isip Milo 21K champion sa 2018 General Santos City leg.

Samtang sa distaff side, si 30th SEA Games women's marathon champion Christine Hallasgo sa Bukidnon miilog sa korona ni Milo marathon queen Mary Joy Tabal sa Cebu City.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph