SUPERBALITA DAVAO

Delos Reyes: Grado 75, kuyaw sa serbisyo!

Yanong Pagsabot

DAGHANG higayon nga gisulti ni President Rodrigo Duterte nga 75 ra kuno ang iyang grado sa pag-eskwela ug iyang mga kuyaw nga klasmet ug mga amigo ang miyembro sa iyang gabinete.

Apan lahi ang gipakitang resulta sa Social Weather Stations (SWS) sa ilang gipahigayon nga survey kay si President Digong lang ang nakakuha og pinakataas nga approval rating sa katawhan samtang nagkaduol ang katapusan sa iyang termino isip pangulo sa nasud Pilipinas.

Sa survey nga gihimo ang pagpangutana sa 1,200 ka tawo nga gipangutana sa SWS, 82 porsiyento sa mga Pinoy ang mitubag nga uyon sila sa pagdumala ni President Digong, gani man daghan sa mga mikumento ang naga-ampo nga hatagan pa siya og kahimsog sa panglawas ug kon mahimo dugangan pa ang mga tuig nga siya magpabilin nga Presidente sa nasud.

Wala usa sa mga nahimong presidente sa nasud nga makatupong sa iyang rekord tungod tanan mitiurok ug nawad-an sa pagsalig sa katawhan samtang naghinapus ang ilang termino sa pamunoan.

Apil ang mga millennials nga nagpangidaron og 18-24 mihatag kaniya og +73 nga pag-uyon sa ilang pagtuo nga maayo ang iyang pagdumala sa kagamhanan sa Pilipinas.

Sukad sa pamunoan sa mga nangaging administrasyon, pulos mitiurok ang pagsalig sa katawhan sa ilang pamunoan.

Ang resulta sa survey sa ika-upat nga quarter sa 2019 naghimo nga walay bili ang yawyaw sa mga kritiko ug mga anti-Duterte nga nagbaliwala sa mga nabuhat sa presidente uban sa ilang mga akusasyon nga berdugo ug mamamatay tao si Digong tungod sa iyang kampanya kontra sa illegal drugs.

Bisan unsa na lang ang ilang giakusa apan lahi ang panglantaw sa katawhan sa ilang nakita ug nabati nga dagan sa nasud ubos sa iyang pamunoan.

Daghan ang nakadayeg kaniya ug nagkanayon nga bahalag medyo bastos siya og sinultihan apan nakadayeg sila sa ka sensero niya sa katungdanan aron hatagan og maayo nga kinabuhi ang mga Pinoy.

Sa excellent rate nga ilang gihatag, ilang gidugangan pag-ingon nga utokan, intelihente si Digong ug may dako nga pagbati sa katawhan. Sa iyang mga lakang, iya sab masulod sa iyang laang ang iyang mga kaatbang.

Sa tuig 2022, mahuman na ang iyang termino apan tingali daghan sa iyang mga gisugdan nga proyekto ang dili pa mahuman. Ang iyang gipakita nga sistema sa pagdumala usa ka kamatuoran nga pwede diay maangkon sa katawhan ang maayo nga kahimtang sa kinabuhi kon magmatinud-anon lang ang mga nagalingkod sa kagamhanan.

Ang maayong binuhatan sa amahan, matanom kini sa hunahuna sa katawhang Pinoy ug magpabilin ang pangalan nga Duterte bisan mokanaog na si President Digong sa iyang lingkurnan sa Malacañang kay sa akong pagsabot moabli ang pultahan alang sa pagsulod sa laing sakop sa panimalay nga mopadayon sa maayong buhat sa ilang amahan.

Kon 75 ra ang grado nga nahimong puhonan ni President Digong sa maayong panggobyerno, sa inyong pagtuo malabwan kaha ni Mayor Inday ugaling itugot sa kahigayonan nga siya ang mopuli sa iyang amahan?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph