Sugilanon: Sala ba ang pagpatay?

Sugilanon: Sala ba ang pagpatay?

SALA ang pagpatay sa isig kaingon? Mao kini ang buhing pulong nga nasilsil sa dughan ug alimpatakan ni Rommel. Apan tungod sa iyang pag-alagad isip pulis, may napatay na siyang mga linalang nga wala motahan ug nakigpinatyanay hinuon kaniya. Wala siya makalikay nga makapatay siyag tawo.

Sa bata pa siya gimatuto siya sa mga pagtulun-an sa iyang ginikanan nga dili mopatay ug labi pang maayo nga mapatay siya aron paghalad sa iyang kinabuhi sa balaanong tinguha ug katuyoan. Pari ang iyang anhing Tatay Anselmo ug mihubo kini sa iyang puting sotana dihang nahigugma sa iyang Nanay Corazon.

Gipatay ang iyang Tatay Anselmo nga walay mitestigo sa pagpatay niini. Anak sa sapiang magpapatigayon ug pulitiko ang gituohang nakapatay sa iyang amahan. Dili kini matandog bisan kinsa. Karon nga usa na siya ka pulis, nasinati usab niya nga wala siya mag-inusara sa pagkaplag og hustisya alang sa iyang Tatay Anselmo. May mga biktima usab sa inhustisya. Di na maihap ang mga biktima nga iyang nasayran.

Diha sulod sa pundok sa kapulisan, may mga kriminal nga nagsul-ob sa uniporme sa kapulisan, mga leyon nga nagsul-ob sa mga balhibo sa karnero. Iya bang patyon sa hilom ang dautang mga pulis? May hukmanan ang gobyerno nga maoy mohusgar ug mosilot sa ilang kadautan. Apan sa dugayng panahon, napanid-an ug nasuta ni Rommel nga ang dautang mga tawo makalugwa ra sa ilang mga kaso. May makapiyansa. May mosekreto sa paghaylo og sapi o kabtangan sa mga kaso sa korte. May mahimong hulgaon ug patyon. Asa pa pangitaa niana ang hustisya ug kaangayan?

Nahibaw-an na ni Rommel nga ang nagpatay sa iyang Tatay Anselmo kaniadto mao ang dautang mga pulis. Milaban ang iyang Tatay Anselmo sa kawsa sa mga kabos nga nagyaka kaniadto sa yuta ni kanhi Gobernador Rustico Demonyito. May demolisyon nga gihimo kaniadto sumala sa sugo sa korte. Apan ang iyang Tatay nga usa sa mga lider sa kabos nga katilingban naghingusog sa pagpugong sa demolisyon. Mao nga hilom nga gitipi sa nasuhulang pulis. Ug ang nagpatay sa iyang amahan nahimo nang opisyal sa kapulisan.

Sa bag-ong panahon, may nahibaloan siyang laing demolisyon sa usa ka dapit. Kaliwat ni Roger Punto si kanhi Gobernador Rustico Demonyito nga nagsugo na usab sa kapulisan sa pagbungkag sa nagbarikadang mga kabos sa ilang dapit. Nahitabo ang dakong kaguliyang ug may pinatyanay. Misalga si Rommel nga nagtaptap sa iyang nawong ug giluthang niya ang dautang mga pulis ug ang bag-ong gobernador sa lalawigan sa ilang dapit. Ug misibat si Rommel sakay sa iyang motorsiklo.

Sala ba ang pagpatay? Gisunog ni Rommel ang dala niyang motorsiklo ug unya gihulog sa halawom nga pangpang. Gilabog usab niya ang pistola sa ubos. Alang kang Rommel, ang hustisya dili mahitabo sa korte sa gobyerno, kay langay-langayon ug maniubrahon lang sa hilom.

“Sala ang pagpatay,” matod niya sa hilom, “apan maoy bugtong paagi nga masumpo ang kadautan!” (Katapusan)

Related Stories

No stories found.
SunStar Publishing Inc.
www.sunstar.com.ph