DIGOS CITY -- Gipangita na sa kapulisan ang suspek nga lalaki kinsa positibong giila sa babaye nga giingong namusil kaniya makatulo ka higayon.
Nahitabo ang insidente samtang nag-inom ang biktima sa may gasolinahan sa Superhighway sa Barangay San Jose alas 11:50 sa gabii niadtong Lunes, Enero 20.
Si Major Rey Santillan, bag-ong ni-asumer nga officer-in-charge sa Digos City Police Office, nag-ila sa biktima nga si Chatherine Mutya Sakarelou, 41, molupyo sa Barangay Aplaya.
Milutaw sa imbestigasyon sa kapulisan nga nag-inom ang biktima kuyog ang mga higala dihang kalit miabot ang suspek ug way daghang rason, gipusil siya.
Hinuon, daling gidala ang biktima ngadto sa Davao del Sur Provincial Hospital apan gibalhin dayon sa Southern Philippine Medical Center sa Davao City.
Mga imbestigador nga misubay sa krimen nagbutyag nga nakatug-an kanila ang biktima nga ang suspek kinsa gipailawom na sa manhunt operation human nakasibat padung sa wa matinong direksiyon.
Narekober sa kapulisan ang tulo ka mga basiyong bala sa kalibre .45 nga pistola atol sa ilang pag-imbestiga sa crime scene.
Di pa masulti sa kapulisan ang motibo sa krimen apan gihikay na ang tukmang kaso batok sa gawasnong suspek. (Orlando B. Dinoy)