TAGUM CITY -- Ginasubay na sa kapulisan sa Tagum City Police Station ang kuha sa closed circuit television (CCTV) camera sa pagpanulis sa nag-inusarang suspek sa gasolinahan alas 7:45 sa gabii niadtong Lunes, Enero 20.
Saysay sa mga biktima nga sila si Lisa Alabat Mamliclic, 30 anyos, pump attendant, ug Maria Fe Villacora, 33 anyos, cashier sa Bumblebee Gas Station, nga kalit silang gitionan og pusil sa wa mailhing suspek nga naka-bonnet.
Una niini, sa dihang pag-abot sa suspek, iyang gibira samtang ginationan og pusil si Lisa padung sa cashier's booth samtang sa sulod sa kahera, anaa si Maria Fe, kinsa gitionan sab dungan sa pagdeklara nga hold-up.
Natangag sa tulisan ang P2,000 nga personal nga kuwarta ni Lisa, samtang mokantidad sab sa P8,000 ang halin sa kahera ang natangag usab.
Human sa hitabo, daling misibat ang suspek, diin giingong misakay sa naghulat nga motorsiklo sa unahan.
Ning kasamtangan, gipanubayan na sa kapulisan ang maong hitabo aron maila ug masikop ang responsable. (Jeepy P. Compio)