DUHA ka mga gagmayng bata nga kasamtangang gi-atiman karon sa iyang amahan ang nabiyaan sa usa ka leadman human kini gipatay sa grupo sa mga kalalakin-an 15th de Septiembre St. Cor Varquez, Barangay 1, Balingasag, Misamis Oriental.
Nahitabo ang insidente niadtong Enero 20 mga ala 1:00 sa kaadlawon apan nakabsan sa kinabuhi si Argie Libaton Tresquio, 28, ulitawo, leadman sa Parasat nga taga Kahoa Pasil, Kausawagan, Cagayan de Oro City, niadtong Enero 21 sa alas 11:30 sa buntag sulod sa Northern Mindanao Medical Center.
Hustisya karon ang gipangayo sa amahan nga si Cesar Tresquio, 66, alang sa kamatayon sa iyang anak nga igo lang nga nanginabuhi.
Giingong duha ka mga anak niini nga gagmay pa ang nabiyaan sa biktima kinsa bulag sa inahan sa mga bata.
"Naningkamot gyud ko kay ila gyud gikuha ang kinabuhi sa akong anak gisayon-sayon lang nila pagkuha murag nakapatay lang sila og iro," matud sa amahan.
Matud sa amahan nga si Argie na ang nagsuporta kanila tungod kay anaa man kaniya ang iyang duha ka mga anak.
Mouli si Argie matag Sabado aron paghatud sa kunsumo.
"Karon, kinsa naman maghatod sa amo og kunsumo nga ila namang gipatay didto, mao na ang ako nga madakpan na ang mga suspek," dugang pa.
Kahinumdoman nga gikan nag-inom ang biktima ug ang laing upat ka mga kauban sa Baywalk, Barangay 3 aron mopauli sa girentahang pad.
Giingong giatangan kini sa unom ka mga wala mailang lalaki nga sakay sa duha ka mga motorsiklo ug gipangsumbag ang mga biktima nga niresulta sa komusiyon.
Gidugang pa nga nakita sa kauban niini nga gisumbag sa wala mailang suspek ang dagway ni Argie sa makadaghang higayon samtang ang duha ang naggunit sa iyang gisul-ob rason sa pagkahagba niini.
Dili pa igo gibundakan pa ang dagway niini og hollow block sa ikaduhang higayon rason sa grabeng naangkon nga samad sa ulo.
Sa pagsulat niini nga balita, kasamtangang nakahaya ang patay nga lawas sa biktima sa ilang panimalay.
Ang kapulisan usab ang nagpadayon sa ilang operasiyon aron nga maila ang mga suspetsado.