Sundalo gidunggab, patay

DUHA ka mga samad dinunggaban ang naangkon sa usa ka sundalo human gidunggab sa wala mailang suspetsado niadtong Enero 22 mga ala 1:50 sa kaadlawon sa Yakal-Lirio Street, Carmen, siyudad sa Cagayan de Oro.

Patay si Corporal Tony Hapas, minyo, lumad sa Marteres Street, Jolo, Sulu, ug aktibong membro sa 4th ID Philippine Army.

Sa pakighinabi kang Police Major Jelesis Teves, hepe sa Police Station 4 (PS4) sa Carmen, gibutyag niini nga gikan pa nag-duty ang biktima sa 4th ID ug nananghid nga moadto sa iyang anak.

"Murag naa siya'y gihulatan gatindog lang siya mga duha ka tikang sa iyang motor ang distansiya, katong mga suspetsado nag-istorya paman daw to sila pagkataod-taod nihagba na daw dayon," matud ni Teves.

Nakaangkon og duha ka mga samad ang biktima labi na sa iyang suwang nga bahin ug sa iyang dughan rason sa hinanaling kamatayon.

Narekober gikan sa patay nga lawas ang iyang 9mm (Glock) SR AFP 014646, three 9mm magazine nga dunay 42 ka mga buhing bala, black sling bag ug XRM motorcycle color black/white.

Padayon pa ang kapulisan sa pagpahigayon og follow up operation aron nga maila ang suspetsado kinsa pabiling gawasnon karong panahona.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph