USA ka hapon sa miaging semana, ako ug ang akong banda, Missing Filemon, nagtambay sa usa ka resort sa Villaba, Leyte, diin scheduled mi nga mag-concert anang gabhiona.
Sa tunga-tunga sa among tagay may nadawat ko nga text gikan sa suod nako nga higala sa Cebu City Hall. Ako ning gibasa.
Paghuman nakog basa gilugod nako akong mata kay sure ko atong higayona nga nagdamgo ra ko, dayon gibasa og balik ang message. Matay, mao man gihapon. Tinuod gyod ni, di ni damgo. Wa nako kapugngi akong mga luha.
“Nganong naghilak ka?” nangutana ang usa nako ka bandmate, si Gumer, ang gitarista. “Wa oy, napuling ra ko,” mitubag ko. “Napuling gud intawon nga nagdangoyngoy man ka diha,” ingon siya. “Waaaaaah,” ningtiyabaw na gyod hinuon ko. “Basaha gud nang akong phone... waaaaah,” ako siyang giingnan, dayon hatag sa phone.
Gitutokan niya pag-ayo ang message, dayong lugod sab sa iyang mata. Ug sama nako, dayong tiyabaw, “Waaaaaaaaah.”
“Ngano mo oy!” nangutana si Ronron, among bahista. “Unsay naa diha?” sumpay pa niya, dayong labni sa selpon.
Gitutokan niya pag-ayo ang message, dayong lugod sab sa iyang mata. Ug sama namong duha ni Gumer, dayong tiyabaw, “Waaaahhh!”
“Hoy mga amaw, ngano mo oy,” nangutana si Eimer, among drummer. “Unsay naa diha?” sumpay pa niya, dayong labni sa selpon.
Gitutokan niya pag-ayo ang message, dayong lugod sab sa iyang mata. Ug sama namong tulo ni Gumer ug Ronron, dayong tiyabaw, “Waaaaaaahhh!”
Sa di pa mo makaingon nga nangabuang na ming upat, among klarohon nga tiyabaw to sa kalipay ang nahitabo, kay kini ang mensahe nga among nadawat: “Congratulations Missing Filemon. The Cebu City Council has just unanimously approved a resolution commending your band for its contribution to Cebu’s culture in the field of music and endorsing your group as a Charter Day awardee.”
“Waaaaaahhh,” nanyabaw na sab mi.
“Ngano mo oy,” nangutana ang upat namo ka roadies. Roadie ang tawag sa crew sa banda. Kauban namo sila kanunay sa among biyahe aron pagseguro nga okay tanan sa among tukar.
Dungan nilang gibasa ang text, dayong lugod sa ilang mata. Ug sama sa banda, dayong tiyabaw, “Waaaahhhh!”
“Mag-celebrate ta. Panagsa ra ni mahitabo sa usa ka banda. Beer pa ‘day!” singgit pa nako.
“Sir, wa na ra bay budget para beer,” ingon ang organizer nga ganina rang nagtan-aw namo.
“Unsa? Waaaaaaaahhhhh,” nagdungan mig tiyabaw tanan.