DAKONG kantidad sa gituohang shabu ang nasakmit sa Philippine Drug Enforcement Agency (PDEA)-Northern Mindanao atol sa gipahigayong duha ka mga operasiyon niadtong Enero 21 sa Barangay Iponan, siyudad sa Cagayan de Oro.
Unang nasikop sila si Randy Arengo alyas Kid-kid Aringo ug nakagawas sa plea bargaining ug delisted kinsa maoy target, ug ang kauban nga si Jefferson Vallejos.
Samtang sa follow-up operation, nasikop usab si Ibrahim Ramos.
Sa pakighinabi kang Investigation Agent-V Expedito Cardona Jr., sa PDEA-Northern Mindanao, gikabutyag niini nga anaa sa 40 porsento sa nagpadagan og shabu sa Macabalan ang suspek nga gikan nila ni Arengo.
"Kaning isa, dili plea bargaining pero nahagip sa among information nga apil nga naglambigit sa distribution sa ilegal nga druga labi na sa Barangay Macabalan," matud ni Cardona.
Gidugang pa niini nga taga Macabalan ang mga parokyano niini.
Nasayran nga unang nasikop si Arengo ug Vallejos mga alas 3:20 sa hapon niadtong Enero 21 sa Barangay Iponan ug sa gabii mga alas 8:30 usab nasikop si Ramos sa susamang lugar kinsa kauban ra usab ni Arengo.
Nasakmit gikan nila ni Arengo ang 70 gramo nga gibanabanang anaa sa P476,000, samtang nasakmit gikan ni Ramos ang anaa sa 100 gramo nga dunay kantidad nga P680,000.
Padayon usab nga nagpahimangno ang PDEA nga moundang na ang mga nigamit niini nga ilegal nga druga tungod kay dili usab sila moundang sa pagpangdakop.