ADUNAY lakang sa Kongreso sa pagmugna og tulo ka mga bag-ong departamento sa gobyerno-ang mga departamento sa mga overseas Filipinos, water resources ug disaster resilience. Ang mga balaudnon alang niini gituki karon sa House of Representatives.
Si Majority Leader Martin Romualdez, chairman sa House rules committee, niingon nga kini maoy ilang unahon sa pagpasar subay sa sugo ni Speaker Alan Peter Cayetano human ilha ang mga balaudnon nga priorities ni Presidente Rodrigo Duterte.
Ilang target, matod pa niya, nga mapasar ang maong mga balaudnon nga magmugna sa Department of Filipinos Overseas, Department of Water ug Department of Disaster Resilience sa di pa mo-adjourn ang Kongreso sa tunga-tunga sa buwan sa Marso.
Si Presidente Duterte mismo nanawagan sa Kongreso sa pagpasar sa maong mga balaudnon atol sa iyang ikaupat nga State of the Nation Address (Sona) niadtong Hulyo 2019, matod pa ni Romualdez.
Ang Department of Filipinos Overseas maoy moatiman sa panginahanglan sa mokabat sa kapin sa 10 milyones ka mga Pilipino nga nagtrabaho sa gawas sa nasod nga sa matag tuig mopadala balik sa Pilipinas og kapin kun kulang $31 bilyones.
Usahay makadungog na lang kita nga dunay mga Pilipino nga nagtrabaho sa gawas sa nasod nga giabusohan, gidaog-daog ug gidagmalan sa ilang mga amo. Ang uban gipatay. Apan way nisapupo kanila. Dunay nanag-atubang og mga kaso pero way nilaban nila.
Ang House Bill No. 5832, nga magmugna sa departamento nga motubag sa maong mga suliran, ubos na karon sa plenary deliberation. Human niini, pagabotohan kini sa House of Representatives sa ikaduha ug sa ikatulo ug kataposang pagbasa.
Ang departamento sa water resources maoy motubag sa kakuwang sa tubig sama sa nasinati dinhi sa Metro Cebu. Matabangan niini ang Metropolitan Cebu Water District (MCWD) sa pagpangita og mga bag-ong tinubdan sa tubig aron 24 oras na nga moagas ang mga gripo.
Ang Pilipinas ginaingon nga morag highway sa mga bagyo. Labing menos 10 ka mga bagyo ang moagi ug mukuso-kuso sa atong nasod matag tuig. Kon kusog ang bundak sa uwan dala sa bagyo, naa usab dayon ang baha. Binilyon ka pesos ang danyos sa kabtangan, pananom ug inprastraktora. Daghan ang mga kinabuhi nga makalas. Duna pay mga linog ug panagsang pagbuto sa bulkan.
Ang tubag niini mao ang Department of Disaster Resilience nga maoy motubag sa mga panginahanglan sa mga biktima sa mga katalagman sama sa super typhoon Yolanda nga nagpakita sa panginahanglan sa maong departamento. (edbarrita@gmail.com)