MIGAWAS sa imbestigasiyon nga posibleng tungod sa grabe nga selos ang hinungdan nga gipatay sa iyang uyab ang usa ka babaye niadtong Enero 16 sa V. Neri Street, Carmen, siyudad sa Cagayan de Oro.
Napalgan ang patay nga lawas ni Ritchel Gonzales nga nakahikot ang liog sa manibela sa usa ka wing van gamit ang bakus sa iyang uyab nga mao si Danilo Torbillas, taga Valencia Cituy, Bukidnon.
Sa pakighinabi kang Police Major Jelesis Teves, hepe sa Police Station 4 (PS4) sa Carmen, gibutyag niini nga dako ang posibilidad nga si Torbillas ang suspetsado labina nga nag-text pa kini sa pamilya ni Gonzales nga iya kining gipatay.
Nagduda ang kapulisan nga posibleng mobiya na kining biktima ug hingpit nga mobalik sa amahan sa iyang mga anak rason sa panag-away nga niresulta sa krimen.
"Uyab-uyab daw diay sila, niuli na siya sa amahan sa iyang mga anak kay gakulatahon daw siya. Last na siguro to nila nga kita kay murag mobalik na siya sa iyang pamilya," matud ni Teves.
Gidugang pa niini nga nag-text si Torbillas sa iyang anak nga dili mokumpiyansa tungod kay iyang gipatay ang maong babaye.
Sa pagkakaron, nagpaabot na lang ang kapulisan sa pamilya sa biktima aron nga hingpit na nga mapasaka ang kaso ug mogawas ang warrant of arrest batok sa suspek.
Posibleng mag-atubang sa kasong murder ang nahisgutang suspetsado.