USA sa mga gituki ni Presidente Rodrigo Duterte atol sa iyang pagbisita dinhi sa Sugbo niadtong Dominggo atol sa Sinulog Grand Parade mao ang nagkagrabe nga problema sa illegal nga drugas diha sa dakbayan sa Talisay. “Grabe pa ang drugas dinhi sa Sugbo labi diha sa Talisay City,” matod pa sa Presidente.
“Ang inyong mga deputy director apil na sa drugas. Gani duna nay gipamatay nga mga chief of police apan wala pa gihapon mahunong,” midugang ang Presidente. Ambot kon si kinsa ang iyang gitumbok nga “deputy director” ug chief of police nga gipatay. Daghan naman tong mga pulis nga gidudahan nga nahilambigit sa illegal nga drugas nga gipamatay.
Aw, natural giangkon ni Talisay City Mayor Samsam Gullas ug sa hepe sa kapulisan sa maong dakbayan, Major Gerard Pelare, ang pamahayag sa Presidente. Alangan man og ila nang ipanghimakak nga Presidente naman ang mibutyag niini. Pero sila nagkanayon nga ilang gipaningkamutan nga masulbad ang problema sa naghitak nga drugas sa maong dakbayan. In fairness, daghan baya pod sila og nadakpan diha.
Gumikan niini, basin makapaabot kita nga daghang pang mga dakop diha o ba kaha patay nga mahitabo. Ambot bisan pa man sa extra judicial killings nga nahitabo karon, wala pa man gihapon masumpo ang illegal drugs. Diha sa Talisay kanang Tangke ug Tabunok labi pa nang ilawom sa taytayan maoy kinagrabehan nga gihugpaan sa pagkuyanap sa illegal nga drugas.
Pero kining pagpakig-away sa illegal nga drugas dili man lang god trabaho sa kapulisan. Nagkinahanglan kini og igong suporta sa katawhan. Mag-unsa man ang atong mga awtoridad kon walay tabang gikan sa komunidad o wala magpakabana ang katawhan. Sama diha sa Tanke, dili man mokooperar ang mga tawo diha. Mangasuko pa kon butangan og dugang pulis. Kay tan-aw nako morag kadaghanan sa mga nanimuyo diha, mora man og nahilambigit sa illegal nga kalihukan. Aw, dako gyud ning hagit ni Mayor Gullas. (bobbygnalzaro@gmail.com)