SUPERBALITA CEBU

Barangay kapitan 'gipatay' sa kabanay

TARANGNAN, Samar – Namatay ang usa ka barangay kapitan ning lungsod human mahutdi og dugo kay wa dayon madala sa tambalanan human madunggabi sa iyang kabanay niadtong miaging Huwebes, Enero 16, 2020.

Giila ang biktima nga si Rogelio Lomentigar, 52, kapitan sa Barangay Mancares ning lungsod diin nahitabo ang insidente.

Samtang ang suspek giila sa kapulisan nga mao si Roberto Lumentigar, 45, minyo, mananagat, nagpuyo sa samang lugar.

Base sa inisyal nga imbestigasyon, problema sa pamilya ang hinungdan sa away.

Nasayran nga gisud ni Roberto, kinsa nagdala og sundang, ang balay sa usa ka Erlinda Abadiez ug nisaka sa taas sa balay.

Nanghawa ang mga nanimuyo sa ibabaw sa balay ug nangayo og pakitabang sa mga silingan tungod sa ilang kahadlok.

Niabot si Rogelio ug gitawag niya si Roberto aron ilang estoryahan ang problema ug sa ingon mokalma.

Apan inay mokalma, nangisog kini ug gigukod hinuon ang kapitan samtang nagbitbit og sundang.

Nadagma si Rogelio ug naapsan ni Roberto.

Nahitabo ang inilogay sa sundang apan kay nalupig sa kusog si Rogeliio, giduslak kini ni Roberto ug naigo sa iyang bukton ang kapitan.

Wa dayon makakita og sakyanan ang mga kabanay aron unta isakay ug madala dayon ang kapitan.

Human makakitag masakyan gidala sa Samar Provincial Hospital nga may gilay-ong mga 27 kilometros si Rogelio apan gideklarar kini nga dead on arrival.

Nasuta nga “loss of blood” ang namatyan sa kapitan.

Nasikop ra usab dayun sa kapulisan si Roberto ug gipasakaan og kasong pagpatay. (JKDP)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph