MATNOG, Sorsogon – Dakong kantidad sa gituhoang shabu ang nasakmit sa mga sakop sa Philippine Drug Enforcement Agency (PDEA) ug Philippine National Police (PNP) sa pier ning lungsod niadtong Huwebes sa buntag, Enero 16, 2020.
Duha ka mga suspek ang nasikop sa kapulisan nga giilang sila si Irish Yap Dela Peña ug Jose Lani Abarido Racaza.
Base sa inisyal nga imbestigasyon, ang dagkong mga putos sa shabu gisud sa usa ka maleta.
Ang mga suspek sakay sa usa ka bus gikan sa Metro Manila ug mosakay na unta og roro nga barko gikan Matnog paingon sa Allen, Northern Samar.
Didto pa lang sa pier sa Matnog, nasimhutan sa K9 narcotics ang usa ka maleta ug sa pagsusi sa mga awtoridad, nakit-an ang dagkong mga putos sa gituhoang shabu.
Base sa inventory, mikabat sa 20 kilos ang gituhoang shabu.
Duna kini kantidad nga miabot sa P136 milyones base sa Dangerous Drugs Board (DDB) value.
Padayun karon nga giimbistigar sa mga awtoridad ang duha ka suspek kon diin gikan ang ilang supply ug para asa ang nakuha nga kontrabando.
Kasong kalapasan sa Republic Act 9165 kon Comprehensive Dangerous Drugs Act of 2002 ang giatubang sa mga dinakpan.
Niadtong Oktubre, 2019, ang kapulisan sa Samar naka intercept og P600 milyunes nga shabu sa lungsod sa Gandara, Eastern Samar.
Ang drugas alang unta sa Sugbo, diin ibilin unta kini sa parking area sa usa ka mall sa Dakbayan sa Sugbo.
Ang 88.49 kilos sa shabu gikuha sa duha ka mga awto gikan sa tinubdan niini sa Quezon City ug Imus, Cavite.
Unom ka mga suspek ang nasikop nga naglakip sa usa ka babayeng mabdos ug 14 anyos nga lalake.
Ang Samar paboritong agianan sa illegal drugs nga gipayuhot gikan sa Luzon kay mingaw ang kasagaran sa mga dapit niini,
Apan sukad nga nabantayan sa mga awtoridad, labina sa PDEA, kining pagpalusot, ila usab nga gipalig-unan ang seguridad sa mga pantalan.
Sagad sa dagkong shipment gituohang alang sa Sugbo ug silingang mga lalawigan.