DILI mominos 450 ka mga vendors gikan sa dakbayan sa Sugbo ang nakadawat og P5,000 nga hinabang matag usa gikan sa Department of Social Welfare and Development (DSWD) human sila nahikawan pagpaninda sa sidewalk gumikan sa gipahigayon nga road clearing operation.
Si Mayor Edgardo Labella maoy nangulo sa paghatag sa livelihood assistance human sila nakapasar sa gipahigayon nga screening para makadawat sa maong hinabang nga gipanguha sa City Government nga mahatag kanila.
“Ganinang buntag (miaging adlaw, Enero 21), sa opisina sa DSWD atong gitunol ang tag P5,000 nga financial assistance to augment their capital without any consideration from the Department of Social Welfare and Development thru the Office of Senator Bong Go ,” pagpasabot ni Labella.
Ang maong kantidad gihangop ug gikalipay sa gatusan ka mga manindahay sa sidewalk diin sagad kanila naninda kaniadto sa Osmeña Boulevard ug dalan Colon apan napapahawa gumikan sa memorandum circular 121 sa Department of Interior and Local Government ubos sa mando ni Presidente Rodrigo Duterte.
Ang vendors giubanan ni Raquel Bohol-Arce, pangulo sa Prevention Restoration Order Beautification Enhancement (Probe) kinsa mga nitabang para usab mahatagan og alibyo ang problema sa mga manindahay.
Si Labella nga nagkanayon nga kadtong kapin o kulang 250 ka mga vendors nga wala pa mahatagi, ila gihapong madawat ang hinabang nga gitagana para kanila sanglit nagpadayon pa ang ilang evaluation bahin sa maong mga tindero ug tindera.
Bisan pa man kon sila gipapahawa sa dalan, apan si Labella ubos sa pagtugot sa buhatan ni Go ug ni Secretary Michael Dino nipabalik sa mga vendors sa dalan Colon ug Osmeña Boulevard sa Sabado ug Dominggo uban sa kondisyon nga dili nila alihan ang sidewalk. (PAC)