KON unsa siya ka-bagsik sa pagpahid og pintal nga adunay laway sa mga tawo nga nangapil niadtong Sinulog grand parade, daw sama na sa usa ka langgam nga nabasa sa ulan ang iyang pamayhon dihang siya nangayo og pasaylo.
Si Jayson John Tapales, lumad nga taga Danao City apan nagpuyo karon sa Panagdait, Barangay Mabolo, nibisita sa buhatan ni Cebu City Councilor Joel Garganera nga giubanan sa mga opisyal sa Danao City aron mangayo og pasaylo sa iyang gibuhat.
“Sa akong napahiran, kinasingkasing nako nga mapasaylo ko nila. Nakonsiyensiya gyud ko sa akong gibuhat. Mangayo sab ko og pasaylo sa Cebu Ciy Government, Danao City Government, sa mga organizer ug sa simbahan kay nagbasol gyud ko sa akong gibuhat,” padayag ni Tapales atubangan sa mga tigbalita.
“Nanghinaot ko nga mapasaylo ko nila, pero kon ila gyud kong pasakaan og kaso, wala koy mahimo kay akoa man gyud tong binuhatan,” dugang ni Tapales.
Ang magtiayon nga Roylls Royce ug Richelli Lizst Arcilla niingon nga makapasaylo sila sa gibuhat ni Tapales, apan desidido sila nga mopasaka og kaso para usab ilang maangkon ang hustisya.
Niadtong higayona, gusto ra sila nga maglingaw atol sa Sinulog.
Si Tapales giubanan ni Danao City Councilor Edmund Lao ug ilang PIO nga si Michelle Mondigo, kinsa maoy unang nihimo og imbestigasyo.
Ilang nasuta nga positibo ug giangkon ni Tapales ang salaod.
Ang gitawag og ‘boy laway’ nga si Tapales kinsa niingon nga wa siyay tarong nga kinatulgan, diyutay ra iyang kinan-an sukad nag-viral ang video sa iyang gibuhat, niingon nga wa siya makasabot sa iyang gibati.
Nakonsyensiya siya human iyang nakita ang video sa tawo nga iyang gihulagway nga wa siya makaila.
Iyang gipadayag nga kadto pa siya nalambigit og kontrobersiya sukad sa iyang pagkabata.
Kadto ang primero nga iyang gibuhat kini kay wa kini niya buhata sa mga Sinulog nga nangagi.
Tun-an
Si Garganera, sa iyang bahin, niingon nga ila unang tun-an ang rekomendasyon sa pulis nga ideklarar og persona non grata si Tapales sa Cebu City.
Iya kining giawhag nga atubangon ang kaso.
“Asking for forgiveness is one. But, I believe he is man enough to face the consequence kay matag lihok nimo, you’re accountable to your action. I asked him to dance with the music. You started this and you end this,” sulti ni Garganera.
Si Garganera nagkanayon nga mohimo sila og mga aksyon aron ang susamang insidente dili na mahitabo sa sunod nga mga Sinulog.
Si Lao nihulagway nga susama usab ang ilang buhaton sa Danao sanglit aduna sad silay festival nga ipahigayon nga tambungan sa daghang mga tawo.
Morekomendar
Hepe sa Cebu City Police Office modusog rekomendasyon ngadto sa Konseho sa siyudad sa Sugbo nga ipaubos sa persona non grata si Tapales.
Matod ni Police Colonel Engelbert Soriano, officer-in-charge sa CCPO nga gibastos ni Tapales ang relihiyosong kalihukan bisan kon tipik sa kalingawan sa pista ang pag spray og pintal sa mga tawo, apan usa kini ka binuhatan nga way pag respeto sa okasyon.
“If you disrespect the occasion, the occasion was solemn. Sideline lang yung parties eh. That’s after the occasion already. But during the time he committed that disrespectful act, it was during the parade. Nakikita ko yung Santo Nino. Nandyan pumunta yung tao for blessings and everything like that and you see one person doing that, its really uncalled for,” matod ni Soriano.
Wa hinuoy pagsupak si Soriano sa pagpahid sa pintal sa dagway sa mga bisita sa Sinulog tungod kay nahimo na kining tradisyon sa mga tawo nga adunay susama nga kalingawan nga himuon sa mga batan-on.
“My personal view is that kultura ito eh, tradisyon. May nagsabi sa akin na people come for Sinulog because of the street parties, parang old na daw yung pagka no party,” dugang ni Soriano.
Samtang magtagbo pag balik ang mga ahensya sa gobyerno nga nag langkob sa siguridad sa Sinulog 2020 aron maoy ilang basehan kon unsay buhaton sa sunod tuig nga kalihukan.
Usa sa ilang tan-awon kon ang signal shutdown naka tabang ba sa siguridad sa Sinulog o mao ba kini ang rason nganong mikunhod ang gidaghanon sa mga tawo nga mibisita karong tuiga.
“Actually yung shutdown nga eh, I think that reduce the crowd no. Kasi uso ngayon FB live, mga ganyan. So, marami ang mga na frustrate doon,” matod ni Soriano. (Dugang taho ni AYB)