Pag-mask, inom og vitamin C

HUMAN gikompirmar sa Department of Health (DOH) nga dunay singko anyos nga batang lalake nga nataptan og coronavirus ug naospital sa Dakbayan sa Sugbo, ang Cebu City Health Department nitambag sa publiko sa pagsul-ob og respirator o face mask, moinom og daghang tubig ug moinom og vitamin C.

Kini samtang ang mga awtoridad sa panglawas sa Dakbayan sa Sugbo naa sa alerto taliwa niini.

Si CHO officer-in-charge Daisy Villa nipahinumdom usab sa publiko sa paglikay sa physical contact sa mga tawo nga dunay sakit sa respiratory, ug sa samang higayon mosampong sa ilang mga baba kon moubo ug mangatsi.

Ang N95 respiratory o face mask mapalit sa tag P50 sa mga botika, samtang ang regular o disposable nga mouth mask balor og P25.

Kinahanglan limitahan sa mga tawo ang pagkaon og half-cooked nga mga pagkaon ug kinahanglan nga luto ang kaunon, matod ni Villa.

Kinahanglan usab nga seguruon nga manghunaw kanunay, dugang niya.

Iya usab nga giawhag ang katawhan sa pagkonsulta sa doktor dayon kon ubhon ug kon ang flu molanat og pipila ka mga adlaw.

Nipadala usab ang CHO og mga personnel ngadto sa Department of Health (DOH) ug sa Mactan Cebu International Airport (MCIA) aron pagdugang og mga tawo nga motabang pag-monitor sa virus.

Task Force

Sa Miyerkules, Enero 22, 2020, atol sa regular session, ang Cebu City Council niumol og task force nga langkuban sa committees on health, public order and safety, CHO, City Disaster Risk Reduction Management Office, City Legal Office, Department of Social Welfare Services (DSWS), Public Information Office (PIO), City Treasurer’s Office, ug City Administrator’s Office.

Ang task force gitawag og “Coronavirus Task Force,” gitahasan sa pag-monitor ug motan-aw sa sakit.

Ang Konseho ni-request sa 80 ka mga barangay sa siyudad sa pagtukod og kaugalingong isolation o quarantine room aron sayon ang pag-monitor sa mga lumolupyo nga dunay respiratory inspections.

Ila usab nga giawhag ang CHO sa pag-abag sa barangay health centers pinaagi sa pagpakatap og impormasyon ug uban pang mahinungdanong mga lakang aron sa pag “ensure public well-being and safety.”

Sa miagi, ang Konseho niawhag sa MCIA sa pagpatuman sa precautionary measures sama sa temperature screenings, onboard inspections sa mga flight gikan sa China, kinahanglan masayod sa panglawas sa di pa mokanaug ang mga pasahero, mga lakang sa panglimpyo ug paglimpyo sa mga dapit sa abyon nga gikan sa China, ug uban pa aron di makasulod ug mokatap ang mga sakit.

Matod ni Villa nga gawas sa singko anyos nga gikan sa China, wa nay laing kaso pa nga gitaho dinhi sa siyudad. (JJL)