MIBALIK og daghan ang distribusyon sa ilegal nga druga sa dakbayan sa Cagayan de Oro sumala sa pamahayag sa Philippine Drug Enforcement Agency (PDEA)-Northern Mindanao.
Kini bisan sa paningkamot sa PDEA diin sunod-sunod ka mga dagkong operasyon ang nahitabo ug ubay-ubay nga shabu ang nasakmit.
Kahinumdoman nga nasikop ang tulo ka mga indibidwal niadtong Enero 21 sa Barangay Iponan. Ang mga suspetsado nailang sila si Randy Arengo alyas Kid-kid Aringo, apan nakagawas pinaagi sa plea bargaining ug delisted kinsa maoy target; ug ang kauban nga si Jefferson Vallejos ug Ibrahim Ramos.
Sa pakighinabi kang Investigation Agent-V Expedito Cardona Jr. sa PDEA-Northern Mindanao, gikabutyag niini nga nidaghan na usab ang ilegal nga druga sa siyudad.
"So very rampant na pud ang distribution sa ilegal nga druga ilabi na sa siyudad sa Cagayan de Oro," matud ni Cardona.
Gidugang ni Cardona nga hagit alang kanila tungod kay ang mga nakagawas pinaagi sa plea bargaining mao ra usab ang player paggawas.
"Katong mga plea bargainers mga gikan sa prisohan sila gyud mostly ang among subject kay maoy ilang modus operandi nga ginabuhat, usually ang mga personality nga gikan sa sulod maoy player pag-abot sa gawas," dugang niini.
Usa sa mga apektadong barangay mao ang Macabalan base na usab sa PDEA.
Padayon ang tinugyanan sa PDEA lakip na kapulisan sa pagsugpo niining ilegal nga druga.