DAGHAN nang debati kon unsaon pagsulbad sa trapik dinhi sa Metro Cebu. Bisan unsa nalang nga mga re-routing ug ubang paagi ang gihimo sa mga local government unit (LGU) apan wala gayud masulbad ang maong problema. Diha untay daghang mga infrastructure projects nga buot ipatuman kay gituhoang makasulbad sa trapik, apan wala mahinayon tungod kay gibabagan sa mga kaatbang sa pulitika ug prugresibong grupo.
Karong bag-o, gisaad ni Presidente Rodrigo Duterte nga mangita siya og pundo aron mapatuman ang mass transportation system sama sa light railway transit (LRT) o kaha monorail. Apan gisaway kini ni Konsehal Joy Agustos Young kay suma niya pakyas kini sa pagsulbad sa traffic problem sa Metro Manila. Nahadlok ko nga mangluod na sad ang Presidente sa maong panaway ug dili na hinuon niya ihinayon ang iyang gisaad. Kahinumduman nga sa dihang gisupak ni Senador Grace Poe ang paghatag unta og emergency power sa Presidente kalabut sa pagsulbad sa traffic sa Metro Manila tungod sa pagduda nga mabulsa ang ubang salapi, wala na kini ipadayon ni Duterte.
Ako nagtuo nga ang pagdisiplina sa mga drayber maoy numero unong makasulbad sa trapik sama sa nahitabo sa Clark, Pampanga. Magkinto usab ang mga drayber didto sa California ug daghang mga states sa Estados Unidos. Kining istriktong pagpatuman sa atong traffic rules and regulations ug ang pagpahamtang sa tukmang silot maoy makadesiplina niining mga badlungon nga drayber. Ang kutong ug suborno maoy makahimo kanilang badlungon.
•••
Mibisita si Vice Mayor Mike Rama sa among tulumanon ni Konsehal Malou Inocando Tabar sa Cebu Catholic Television Network (CCTN) Channel 47 ang “Hello Cebu, Maayong Buntag Pinoy.” Among nasayran gikan kang Rama nga wala siya makauyon sa pagtukod sa governing board sa Sinulog 2020 tungod kay wa na kini kinahanglana hinunoa nakadala lang og mga problema sama sa pagpa-imprinta sa mga Sinulog ticket. Sumala ni Rama nga kon kwarta maoy gibantayan sa governing board, wala kini kinahanglana kay naay internal ug external auditors ang Sinulog Foundation, Inc. (SFI). Dili usab angay dudahan ang trustees sa SFI tungod kay tinamud silang mga Sugboanon. Anaa na usay advisory board ang SFI.
Sumala ni Rama nga dili siya makig-away kang Mayor Edgardo Labella labi na kay anaa pay dakung kalihukan sunod tuig nga mao ang kasaulogan sa ika-500 nga anibersaryo sa pagka-Kristiyanos sa Pilipinas. Apan sumala niya nga andam siyang makig-away kon maoy gusto sa grupo sa mayor. Iyang nalakbitan nga anaay mga tawo nga maoy mohimo og intriga nga maoy maka-ingon sa ilang dili pagka-sinabut usahay.
Kon modagan ba siya sa pagka-mayor igo lang siyang motubag nga modagan siya sa bisan unsang pwesto kon maoy gusto sa katawhan. Apan sa akong pangagpas modagan siya sa pagka-mayor bisan kon kinsa ang iyang kaatbang. Iyang giklaro nga dakung buhi ug lig-on pa ang ilang partido nga Barug – Team Rama. (mannyrabacal1144@gmail.com)