SI PRESIDENTE Rodrigo Duterte, sa iyang pagbisita sa syudad sa Sugbo niadtong Dominggo atol sa Sinulog grand parade, namahayag ang ang usa ka railway system mao ang makasulbad sa kahuot sa trapiko sa Metro Cebu.
Nisaad usab ang pangulo nga motabang sa pagsulbad sa nagkagrabe nga trapiko sa Sugbo pinaagi sa pagpangita og pundo alang sa solusyon niini. Panahon na tingali nga madayon na ang monorail o kaha light railway transit (LRT) system sa Sugbo.
Ang LRT sa Manila niadto pa sa 1980s. Ang Sugbo dunay railway system kaniadto sa panahon nga ang Pilipinas ubos pa sa pagdumala sa mga Amerikano. Apan naguba sa panahon sa Second World War ug nawagtang sa hingpit.
•••
Matod sa Presidente lisod na nga palapdan ang mga karsada sa Metro Cebu, ilabi na sa syudad sa Sugbo nga usa ka karaan nga syudad. “Wala pa atong gobyerno, naa na ang inyong dan. So when it became a city, mao nang naghuot mo,” matod pa niya.
Unsaon sab nga sa unang panahon mga tartanilya ra man ang mamasahero sa mga kadalanan sa syudad kaniadto. Ang nahitabo, ang mga karsada di kaayo lapad kay gisukdan man lang ang duha ka tartanilya nga magsugat.
Nakaabot pa kog sakay og tartanilya kaniadto sa dalan Sanciangko. Pagsakay nako, niingon ang kutsero, “Ikaw ray mosakay, Dong?” Ako sab siyang gipangutana, “Ikaw diay, Noy, manaog diay ka?”
•••
Dugay na nga gihisgutan ang usa ka train system alang sa Sugbo apan hangtod karon pulos pa lang estorya. Ang bus rapid transit (BRT) wa na igdungog kon unsay nahitabo nga duna man untay pundo alang niini.
Ang mga plano mao nga dunay tren nga magkonektar sa syudad sa Sugbo ug sa Mactan Cebu International Airport (MCIA) aron di na malangay kadtong dunay mga flight. Laing tren magkonektar sa mga syudad sa Talisay ug Mandaue City. Lain pang tren magkonektar sa mga syudad sa Carcar ug Danao.
Kon morag uwan nga nagbunok ang mga infrastructure projects sa Metro Manila, morag talisik ra ang mga infrastructure sa Metro Cebu. Basin nag mausab kini sa panahon ni Presidente Duterte.