ATUBANGAN sa mga sakop sa media, nangayo og pasaylo si Jason John Tapales sa iyang pagbutang og pintal nga dunay sagol nga laway sa mga tawo nga nanambong sa Sinulog grand parade.
Nakonsensya ug gibasolan niya ang iyang nahimo nga matod niya labing unang higayon kadto niya nabuhat. Sukad nag-viral ang video sa iyang gibuhat, wa na siyay tarong nga kinatulgan ug kaon gumikan sa kaguol.
Si Tapales giubanan sa duha ka mga opisyal sa Dakbayan sa Danao ngadto sa buhatan ni Cebu City Councilor Joel Garganera, kinsa usa sa nangita kaniya human makakita sa video.
Nisulti si Garganera ngadto kang Tapales nga makapasaylo siya, apan kinahanglan nga iyang atubangon ang linugdangan sa iyang gibuhat. Hinuon, niingon si Tapales nga andam siyang moatubang kon unsa man. Angay bang pasayluon si Tapales? Niangkon na man siya nga nagbasol ug gimahayan ang iyang gibuhat. Nangayo na siya og pasaylo sa iyang gibuhat.
Di tingali mouban si Tapales ug motago na lang kon di pa siya sinsero sa iyang pagpangayog pasaylo ngadto sa publiko, labina sa mga Katoliko nga nainsulto sa iyang gibuhat ug sa kadtong iyang napahiran og pintal.
Mahimo ra kaayo niyang motago hangtod nga magbugnaw na ang hitabo. Apan gipangisgan niya ang pag-atubang sa media aron ipadangat ang iyang mensahe. Kana igo na kaayo nga basehan nga dawaton ang iyang pagpangayog pasaylo.
Apan katungod usab niadtong hingtungdang mga tawo nga iyang napahiran og pintal sa paghimo og lakang, ikiha ba siya o di. Lain man gud ang pagpasaylo ug paghimog lakang batok sa nakasala.
Usa usab sa tumong sa paghimog lakang sa sama ani nga kaso aron mahadlok na ang si bisan kinsa nga mohimog samang kabuang sa umaabot pa nga mga Sinulog festival. Pagpatagam ba.
Apan sa nahitabo karon ni Tapales sa social media diin gi-bash siyag maayo, igo na kining makapahadlok.