SA IKANAPULOG usa nga sumad sa adlawng natawhan ni Glen, sila lang si Mama Gina niya ang milugsong sa poblasyon sa ilang lungsod aron manimba, kay ang iyang tatay niya Benito nagtumod sa merkado sa bag-ong dawat nga tuba gikan sa iyang sanggutan. Nagsabot lang sila ganihang sayong buntag nga mag-abot sa tindahan ni Mirasol nga naa sa taboan sa bukirang barangay sa Pakaron. Magdungan silag paniudto didto.
Pinangga kaayo nilang Gina ug Benito ang bugtong nilang anak nga nakahuman og grade four sa Pakaron Elem. School. Kada sera sa klase nakasaka sila sa bantawan aron tauran og ribon si Glen. Brayit kaayo nga pagka bata si Glen. Kaupat na siya ma-first honor. Karon sunod nga abli sa klase, grade five na siya. Mahinamon ang iyang ginikanan nga mopa-enrol kaniya.
Pag-abot nila sa tindahan og puso ug barbekyu ni Mirasol, nagmug-ot ang mga nawong sa inahan ug anak. Wa sila magtingog nga nanglingkod sa bakanteng bangko duol sa barbekyuhan. Wa pa mahiabot si Benito.
“O, nganong mora mag Biyernes Santo ang hitsura ninyong duha?” ni Mirasol samtang namaspas sa mga langaw. Naisa ang iyang mga kilay.
Miduko si Glen.
“Hmmph! Subra kabrayit bataa. Ginganlag bakakon ang pari human sa misa!” ni Gina.
“Tinuod na, Glen?” ni Mirasol
“Para nako, ang lay minister nga nagbasa sa Bibliya ang namakak. Pero ang pari kay mao may lider sa simbahan mahulog nga namakak sab siya,” ni Glen nga mibalik pagduko, daw nahadlok sa iyang gipamulong.
“Naa diay bakak ang Bibliya?” ni Mirasol. Gituyok niya ang barbekyung giinit.
“Para nako tinuod ang tanang unod sa Bibliya. Pero ang nagbasa maoy namakak,” ni Glen nga wa gayud mopahiyom.
Nahatutok si Mirasol sa bata.
“Sa unang pagbasa nadungog namo ang lay minister nga namulong, ‘Ang unang pagbasa kinutlo gikan sa sulat ni Pablo ngadto sa taga Roma...’ Pagkahuman niyag basa sa Bibliya, namulong na pod siya, ‘Ang pulong sa Diyos!’ Paggawas namo sa simbahan miingon si Glen nga namakak ang lay minister!” ni Gina nga nagmug-ot gihapon.
“Nganong bakak man, Glen?” ni Mirasol.
“Bag-o pa ganing gibasa niya ang sulat ni Pablo, nahimo na dayong pulong sa Diyos. Diyos na diay si Pablo? Naa na diay sa ubos ang Diyos? Nahimo na lang siyang santo o apostol? Bugalbugal na. Nya, naa pa gyud sulod sa simbahan,” ni Glen nga mibukhad sa duha niya ka palad.
Nahasiga ang mga mata ni Mirasol. Matod niya kang Gina, “May punto baya ang bata. Kamoy sad-an, kay inyong gipa-eskuyla. Misamot ang kahait sa iyang salabutan.”
Nakapanghupaw si Gina. Milantaw siya sa halayo.
“Suginli unya ang imong tatay inig-abot. Paminawon natog unsay iyang ikasulti sa imong obserbasyon,” ni Gina. Wa na siya mopakita og kalagot. Unya miingon siya kang Mirasol, “Bi, tagai nuon mig tagsa ka puso ug barbekyung baboy. Gutom na man!”
Unya gihapuhap niya ang ulo ni Glen. Mipahiyom na ang bata. (Katapusan)