BANSALAN, Davao del Sur -- Gisaulog sa mga pamilyang bakwit human naapektuhan sa linog ang kapistahan ni Sr. Sto. Niño bisan ug anaa sila sa mga evacuation center sa Barangay Altavista, kagahapong adlawa, Huwebes, Enero 23.
Gitataw sa mga pamilyang biktima sa tulo ka sagunsong linog nga dako gihapon ang ilang pasalamat sa ilang patron nga si Sto. Niño kay bisan og nangaguba ang ilang mga balay, apan anaa gihapon ang ilang pagtinabangay sa matag usa.
Usa sa mga nagsaulog sa kapistahan mao ang pamilyang Sedon ug Julian, kinsa mitataw nga di mahimong di nila i-selebrar ang pista sa Sto. Niño kay dako ang ilang pagsalig nga gihatagan gihapon sila og proteksiyon dihang mitay-og ang hilabihan kakusog nga linog.
Sumala ni barangay kapitan Randy Navarro nga anaa sa 252 ka mga pamilya ang naigo sa linog diin ang 246 niini nagpabilin pa sa evacuation center, samtang ang unom nagtukod og tulda sa ilang tugkaran.
Human gisusi sa Mines and Geosciences Bureau (MGB) ang dapit, girekomenda ang forced evacuation sa Sitio Sunop sa lugar human nakita ang mga dagkong liki o tension cracks human ang sagunsong linog sa miaging tuig.
Matud ni Navarro nga 130 ka pamilya ang pugsanong pabalhinon gikan sa maong lugar.
Apan, nahimong suliran karon sa mga opisyal sa barangay kay gikinahanglan nila ang upat ka ektaryang relocation site apil niini ang luna nga kabutangan sa ilang barangay hall.
Si Navarro nagbutyag nga mokabat sa P1.2 milyones ang gikinahanglang badyet apan naglaum siya nga motabang kanila ang munisipyo base sa saad sa mayor kaniya.
Gikinahanglan sab sa mga molupyo ang diversion road sanglit delikado na sa landslide ang daang agianan.
Taud-taod na nag-antus sa mga evacuation center ang mga bakwit mao nga nanawagan sila sa lokal nga gobyerno nga maplastar na ang ilang kapuy-an aron mahibalik na sa kinabuhing normal ang ilang pamuyo. (Orlando B. Dinoy)