MIBAHAD si Filipino Johnriel Casimero nga iyang i-knockout si Japanese boxing superstar Naoya Inoue sa ilang unification bout karong Abril 24, 2020 (US time) sa Las Vegas, USA.
“Automatic na,” matod ni Casimero dihang gipangutana sa Sun.Star Cebu, igsuong buhatan ning mantalaan, kon plano ba niining pakamangon ang gitawag og “Monster” human nahan-ay ang ilang away.
Matod ni Casimero, kinsa usa ka three-division world champion ug kasamtangang naggunit sa World Boxing Organization (WBO) bantamweight title, nga mao kini ang labing dakong away sa iyang kinabuhi isip boksidor ug buhaton niya ang tanan aron magmalampuson.
Gipasabot ni Casimero nga sa iyang tan-aw, grabe ang binukbokay nga masaksihan sa ilang panagsangka ni Inoue ug paninguhaon niya nga siya ang mopatigbabaw.
Si Casimero gikan sa usa ka dakong kadaugan dihang gipaundang niya si South African Zolani Tete aron ilugon ang WBO bantamweight title niadtong Nobiyembre 30 sa miaging tuig sa England.
Sa iyang bahin, si Inoue, kinsa maoy tag-iya sa World Boxing Association (WBA), International Boxing Federation (IBF) ug The Ring bantamweight titles, gikan sab sa dakong kadaugan diin iyang gilupig ang kababayan ni Casimero nga si Nonito “Filipino Flash” Donaire pinaagi sa unanimous decision.
Grabeng binukbokay ang nasaksihan sa away nila ni Inoue ug Donaire diin nakapuntos og knockdown ang Hapon hinungdan nga nakuha niya ang kadaugan.
Alang kang Casimero, maayo unta ang gipakitang away ni Donaire batok kang Inoue apan wala lang napatumba ni Donaire ang gikonsiderar nga labing maayong boksidor sa kalibutan sa bantamweight division.
Gipasalig ni Casimero nga ipagawas niya ang iyang tanan nga makaya aron mabuhat niya ang wala nabuhat ni Donaire ug sa tanang miaging mga kontra ni Inoue.
Si Casimero naghupot og 29-4, 20KOs nga rekord samtang si Inoue adunay 19-0, 16KOs nga baraha. (EKA, ESL)