NANGANDOY ka ba nga mosuroy sa Taiwan? Hilig ba nimo ang adventure?

Akong isugyot nga suwayan ninyo pagsuroy sa Taroko Gorge o nailhan nga Taroko National Park, Hualien County, Taiwan.

Dili kini ang naandan na nga tourist destination kon moduaw ka sa Taiwan, apan sa akong bahin gawas paborito ko usab nga laagan ang may labot sa kalikupan sama sa dagat, bukid o ubang landform, haom ang Taroko Gorge.

Ang akong suod nga higala, ang nang-agni nako uban ang iyang mga kauban sa Mines and Geosciences Bureau (MGB)7 ang motuyo sa pagduaw sa Taroko Gorge, dungan na sa ilang gihimo nga pagtuon sa mga bato ug unsa kini nga klase.

Wa nako magduha duha sa pagtando. Go gyud dayon.

Wa ko magbasol kay ang Taroko National Park usa sa walo ka national parks sa Taiwan ang adunay 19 kilometro nga gitas-on nga canyon wrinkles nahimutang sa north eastern coast sa Taiwan.

Kon gikan ka sa Sugbo, naay mga promo fare sa nagkadaiyang airline company, adunay P4,000 ug kon swertihon mas menos nga pletehan nga round trip sa Cebu to Taoyuan International Airport, Taipei.

Sa pag-abot mo sa Taoyuan airport, way hasul kay konektado na ang tanan nimung kasakyan tungod sa ilang Mass Rapid Transit (MRT).

Easycard

Akong ikatambag nga diha pa lang sa tugpahanan mas maayo nga mopalit og ‘Easycard’ sa kantidad nga 100 NTD nga maoy imong pa-loadan base sa imong afford nga kantidad kay dako kini og gamit ilabi na sa pagsakay-sakay og train.

Magamit sab ang easycard nga bayad sa ubang mga tindahan sa Taiwan, sama sa 7/11 ug family mart.

Igo lang nimo i-tap ang maong card, sa imong pagsulod ug paggawas sa mga entry ug exit points diha sa underground MRT.

Unsaon pag-adto

Gikan sa Taoyuan airport, kinahanglan mo mosakay og MRT padung sa Taipei Main Station nga molanat og 30 minutos.

Sa Taipei Main Station, pangitaa lang ang lukatanan og ticket nga padulong sa Rough Diamond Hualien County nga nahimutang Southeast sa Taipei.

Tag - 440 NTD kon buot mo nga two hours and 30 minutes nga biyahe lang ug P238 alang sa dul-an upat ka oras nga byahe.

Sa Hualien, aduna usab mga baratong hotel o inn, ug mas maka-menus pa sa bayrunon ilabi na kon aduna kay mga kuyog nga ka-share sa bayad.

Sa among sitwasyon, pito mi nga mibiyahe hinungdan nga alang sa among tulo ka adlaw ug duha ka gabii nga pag-estar, nagbayad lang kami kada usa og tag 1,116NTD.

Ug sa inyong pagsuroy sa Taroko Gorge, mamahimo ka mo nga maka-book sa tour application o mas maayo usab ang Do it yourself (DIY) nga paagi, mahimo ka nga mag-bus o mag-taxi.

Sa amo nga case, na-swertehan lang usab kami kay adunay niduol namu nga babayeng taxi driver samtang nagpangita kami og bus nga kasakyan.

Si Tiffany Chang, 20 ka tuig na nga taxi driver ug tourist guide na usab sa Hualien, ilabi na sa Taroko National Park, kinsa kahibalo na sa pinulungan nga English ug labaw sa tanan naka-diskwentona usab kami.

Tag-600 NTD lang ang iyang pangayo sa matag usa, alang sa tibuok adlaw na nga tour, siya na usab ang among photographer, ug tour guide.

National Park

Sa pag-abot pa lang namo sa main entrance sa Taroko National Park nisugat ang makabibihag ug majestic nga mga bato, nga susama og tinuyo nga gipang-porma dunganan sa linaw kaayo nga tubig sa sapa.

Una kining nailhan nga Tsugitaka-Taroko National Park niadtong 1937 ubos sa Empire of Japan, apan gipasirhan niadtong 1945 ug subling gi-establisar November 28, 1986.

Una namu nga gi-agian ang Shakadang Trail diin ang bus ang mosud sa usa ka tunnel og mohunong sa 94-meter nga bridge, o mas naila nga Shakadang bridge.

Ang maong taytayan ang gipalig-on sa 100 ka stone lions nga susamag gituyo kini og papahimutang og maayo diha sa mga kilid-kilid niini.

Gikan sa taytayan gikinahanglan mo ang pagkanaug sa taas-taas nga hagdan una makaabot sa Shakadang Trail.

Ang Shakadang Trail mas naila usab nga mysterious Valley trail anga dunay 4.5 kilometro nga gikinahanglan nga magbaktas sa cliff side sa misteryoso usab nga pagkahulma nga mga bato-bato sa kilid ug usahay isig ka daplin.

Subayon lang ang trail ug mabuhong kana sa pagtan-aw sa nagkadaiyang porma sa mga bato, ang kalimpyo sa palibot, bisan na ang hangin nga hanggapon ug kalimpyo o crystal clear nga tubig sapa.

Makita usab nimu ang grabe nila nga pagpreserba sa mga sand and gravel nga matud pa sa mga kauban kong mga taga MGB nga kon i-quarry kadto, bilyones ang balor.

Sa Jiuqudong kon Tunnel of Nine Turns, gi-ila kini nga pinaka-marvelous nga spot sa Taroko Gorge kay dinhi ang mga pangpang dug-ol kaayo sa usag-usa nga hapit na maghalok.

Matud pa man sa usa nako kahigala nga geologist, nga ang maong mga higante bato o pang-pang ang gibana-bana nga anaa na 200,000 ka tuig.

Samtang sa Changchun Shrine o mas naila nga Eternal Spring Shrine, iconic nga lugar sa Taroko, diin ang spring water, kon ang nadagayday nga tubig ang makita sa layo nga gikan sa shrine padung na sa sapa, diin nag-sanga-sanga ang giagian sa water fall niini.

Ang maong shrine ang gihimo agig paghandum sa 226 ka Taiwanese military veterans kinsa nangamatay sa pag-construct sa central Cross-Island highway.

Giisip ang Changchun Shrine nga peaceful sanctuary sa maong lugar.

Anaa usab ang mga man-made structures sama na sa Bell Tower, diin ron makaabot ka sa iyang nahimutangan, mag-stuggle sa ka pero worth it.

Gikan sa Eternal Spring Shrine, gikinahanglan mo moagi sa hanging bridge dayon agi og gatusan ka mga hagdan una mo kini maabot.

Diha sa Taroko Gorge makita subtropical forests, nga pinuy-anan sa 144 species sa mga langgam, 251 butterflies, 32 reptiles, ug 30 ka species sa dagkong mammals.

Isip pakapin gisuroy usab kami sa Chishingtan Beach, kansang kabaybayunan ang nag-atubang sa Pacific Ocean ug kabaybayunan ang napuno sa nagkalain-laing klase sa mga hamis nga bato.

Dili usab mawala ang food trip, ilabi na diha sa ilang night market, kay anaa ang mga lamian ug barato nga pagkaon.