GIKATAHAPANG bigtime drug pusher nga namalit og mga kabtangan sama sa yuta, balay ug mga sakyanan nabunggo, nadakpan hinuon.
Ang suspek nga nakagawas human makapyansa sa miaging tuig nasikop sa kapulisan sa Dakbayan sa Mandaue sa usa ka buy-bust operation alas 4:30 sa kadlawon sa Huwebes, Enero 23, 2019 sa Sitio Bohol-bohol, Barangay Looc, Mandaue City.
Nakuhaan og P1.02 milyunes nga shabu ang suspek nga giila nga si Ricky Cruz Polancos, 39, taga Sitio Zapanta, Barangay Tejero,Cebu City.
Si Polancos giila nga high value target, nasikop sa grupo ni Police Lt. Col. Franco Rudolf Oriol sa Mandaue City Police Office (MCPO.
Sigon ni Oriol nga nadakpan na si Polancos ug nabilanggo sa Cebu City Jail sa susamang kaso sa pagpamaligya og illegal nga drugas, apan ginagmay lang.
“Naka-apply siya og bail maong nakagawas siya,” sigon ni Oriol.
Human nakagawas sa jail, sigon ni Oriol nga nakapalit dayon kini og mga property sama sa mga sakyanan, balay ug yuta sa Liloan, Cebu City ug Mandaue City.
“Nakita nato iyang lifestyle nga nikalit gyud og saka,” sigon ni Oriol.
Sigon sa suspek nga si Polancos nakagawas sa Nobiyembre sa miaging tuig.
‘Di tinuod’
Gihimakak sab ni Polancos ang mga alegasyon batok niya nga nakapalit siya og mga property.
Gani gipalayas sila sa subdivision sa Labangon nga ilang gipuy-an human wa sila kabayad sa ilang abang.
Anaa si Polancos sa drug watchlist karong tuiga.
Makabaligya siya og usa ngadto sa duha kilo nga shabu matag semana.
Sagad sa iyang mga transaksyon di mominos og 50 gramos, sigon ni Oriol.
Mo-deliver siya og drugas sa Cebu City, Mandaue City, Lapu-Lapu City ug ubang lugar sa probinsya sa Sugbo.
Nakuhaan siya og 150 gramos sa gituohang shabu nga nagbalor og P1.02 milyones.
Dugang ni Oriol nga ang supplier ni Polancos gikan sa Manila, susama sa nag-supply og shabu kang Dave Natividad, kinsa nakuhaan sab og duha ka kilo nga shabu.
“The same group from and the same packaging,” dugang ni Oriol.
Gisusi pa sa kapulisan ang ubang mga contact ni Polancos labi na sa mga contact nga iyang gihinganlan nga anaa pa sa sulod sa Cebu City Jail.
Courier nangyawat
Giingong tighatod og shabu nangindahay nga makakwarta og P3,000 nga suhol bugti sa 100 gramos nga mahatud niya sa kustomer nadakpan sa buy-bust operation niadtong Miyerkules sa hapon, Enero 22, 2020.
Wa masayod ang suspek nga construction worker nga mga ahente diay sa Philippine Drug Enforcement Agency (PDEA) 7 ang ni-contact kaniya.
Si Jimboy Betos, 22,taga Sityo Almacen, Barangay Calamba, Siyudad sa Sugbo nasikop sa PDEA 7 ug mga sakop sa Labangon Police Station sa dan A. Lopez, Barangay Labangon.
Si Agent 1 Jessie Cabutotan, nangu sa operation, nibutyag nga tulo ka adlaw nilang gipanid-an si Betos human sila makadawat og impormasyon.
Bisan tuod kon usa siya ka construction worker, giisip si Betos nga HVT nga drug courier kay dinagko ang iyang mga transaksyon.
Ang shabu nga nakuha gikan niya mobalor og P680,000 base sa Dangerous Drugs Board (DDB) value).
Si Betos niangkon nga iyaha ang shabu, apan matod niya una kadtong higayon.
Samtang sa unang buy-bust sa laing team sa PDEA-7, unom ang nadakpan sulod sa usa ka drug den sa Martes sa gabii sa sudlonong bahin sa Sityo Buwaran, Barangay Sawang Calero.
Si IA3 Ivy Claire Oledan, team leader, niila sa mga suspek nga sila si Bernardo Vicente Son, 22, target, ug laing lima pa nga sila si Remar Sunggahid Samarez, 32; Jenel Pacilan Nicolas, 33; Wendel Agusto Fernandez, 27; Jeremy Tumulak Solis, 43; ug Jemboy De Lima, 30, pulos taga Block-7, Sityo Buwaran, Barangay Sawang Calero.
Matod ni Oledan nga gawas sa ilang personnel sa PDEA -7,kuyog usab ang PDEA-8.
Dunay dinakpan ang PDEA 8 nga si Son ang palitanan.
Nasakmit ang illegal drugs nga balor og P70,000 lakip na ang mga drug paraphernalia.
Si Son mapasakaan og kaso nga kalapasan sa Section 5,11 ug 6 samtang ang laing lima sa section 7 sa Comprehensive Dangerous Drugs Act of 2002.
Minglanilla
Unom ka mga tawo nasikop sa sunod-sunod nga buy bust operations sa Huwebes, Enero 23.
Lakip sa nasikop ang managlive-in nga HVT sa Brgy.Linao-Lipata,Tunghaan ug Pakigne, lungsod sa Minglanilla.
Si Zeinav Bahtajie, 37, taga Brgy. Linao- Lipata, HVT provincial level, napusasan uban sa kapuyo nga si Mary Keith Amistoso, 22, taga Pakigne, nasikop human sa buy-bust operation.
Si Major William Homoc, hepe sa Minglanilla Police station nga nahinabi sa Superbalita Cebu, nagkanayon nga ang manag live-in ilang gi buy bust, gipalitag usa ka putos nga shabu balor og P200.
Dihang napusasan nakuhaan pa sa ilang possession og tulo ka medium nga putos sa shabu nga balor og P65, 000.
Matod pa ni Homoc nga ang mga dinakpan live in partner dunay kontak nga piniriso sulod sa Cebu City Jail.
Nadakpan sab sa Huwebes sa buntag si Rogelio Cabañero, 43, ulitawo, atol sa buy- bust sa Brgy.Pakigne.
Si Cabañero nakuhaag usa ka putos ug laing duha ka medium nga bulto nga mobalor og kapin sa P50,000.
Samtang tulo ka drug surrenderer nadakpan sab sa buy bust operation.
Si Frandy Rayno, 36, ulitawo, nadakpan Huwebes sa kaadlawon sa Brgy. Linao-Lipata ug nakuhaag upat ka putos sa shabu.
Nasikop sab si Erwin Mindoy, 50, ulitawo, taga Brgy. Linao-Lipata.
Laing nadakpan ang drug surrenderer nga si Nestor Villafuerte, 65, taga Brgy.Tunghaan. (KFD, BBT, GPL)