LIBRE. Walay bayad ang tubig nga gigamit sa mga deboto ni Sto. Niño nga temporaryo nga nipuyo sa Devotee City sama sa mga bata nga nanghugas sa ilang mga kinan-an.
Libo-an ka mga deboto ni Sr. Sto. Niño nga temporaryo nga mipuyo sa Devotee City gihatagan og libre nga tubig-mainom sa Metropolitan Cebu Water District (MCWD).
Duha ka gripo ang gi-instolar sa MCWD sa Devotee City nga nahimutang sa entrance sa South Road Properties (SRP) sa syudad sa Sugbu.
Ang libreng tubig magamit sa mga deboto gikan sa lagyo nga mga lugar nga walay kapoy-an atol sa kapistahan.
Si Susana Villalon, 52, mibiyahe gikan pa sa probinsya sa Dumanjug kuyog iyang pamilya aron moduyog sa pagsalulog sa pyesta ug aron iyang mapakita iyang debosyon kang Sr. Sto. Niño.
Midayeg si Villalon sa MCWD sa tabang nga nahatag kaniya ug sa iyang pamilya kay duna silay magamit nga tubig samtang nagpuyo sila sa Devotee City.
“Salamat kaayo kay naa mi kapoy-an, katulogan, kabinlan sa among mga bata samtang mamaligya mi og kandila ug tubig nga magamit. Lisora kon walay tubig kay dili namo kaya kon paliton sa gawas sa tulo mi ka adlaw sa Devotee City,” matod niya.
Namaligya og kandila si Villalon ug matod niya, igo lang nila i-plite ang ilang halin sa pag-uli nila sa probinsya.
Sa laing bahin, emusyonal si Edwin Rosenio, 23, nga misaysay sa hinungdan sa iyang pagbisita ni Santo Niño. Masakiton iyang kinamaguwangang anak ug gi-ampo niya sa little Jesus nga mamaayo kini. Tungod niini, panaad niya nga kada tuig siya mobisita sa imahen ni Santo Niño.
“Dako og tabang nga libre ang tubig kay di na mi mag palit-palit sa gawas, di na moadto pa sa layo,” matod ni Rosenio.
Ang MCWD usa sa mga ahensya nga mitabang sa Cebu City Government aron maserbisyohan ang mga deboto sukad paglunsad sa Devotee City niadtong 1995. (PR)