USA ka 22 anyos nga Russian National nga nag binugtong nga nibakasyon lang sa usa ka resort sa Panglao, lalawigan sa Bohol ang mireklamo nga gilugos sa usa ka lumad nga manindahay niadtong Martes sa buntag, Enero 21.
Nailhan hinuon dayon ang suspek human gihatod ang cellular phone nga iyang gikuha sa biktima diin naa didto ang ilang selfie.
Ang babaying Russian national nagtrabaho isip magtutudlo sa China ug mibakasyon lang sa Panglao niadtong Enero 20.
Matod ni Police Staff Sergeant Vicky Villaber ang personnel sa Women and Children Protection Desk sa Panglao police station nga sayo nga miadto sa baybayon ang biktima diin giduol siya sa suspek ug giagni nga mopalit og alahas.
Apan wala siya mopalit niini inay nangutana nalang siya asa maka palit og tualya nga gitultolan usab dayon sa suspek.
Tungod kay walay dalang kwarta ang biktima, ang Badjao na ang mi boluntaryo nga gamiton lang una ang iyang kwarta aron makapalit og tualya ang langyaw.
Sa dihang mobalik na unta sa iyang hotel ang langyaw aron kuhaon ang iyang kwarta ug bayran ang Badjao, giubanan siya niini apan didto na siya giagi sa mingaw nga lugar ug dayong tuok kaniya ug gipahigda sa kakahuyan.
Tungod sa pagtuok, nawad-an siya og panimuot ug sa iyang pagmata nahubo na ang iyang panty ug short pants, wagtang ang iyang Iphone.
Ang kapulisan sa Panglao aduna nay suspek nga gitumbok nga taga lungsod sa Dauis nga gipangita na karon.
Dugang ni Villaber, ilang nailhan ang suspek tungod sa cellular phone sa biktimanga nauli. (AYB)