WALA mopasaka og kaso batok sa drayber sa prime mover truck ang hingtungdan sa namatay nga habalhabal drayber ug ang angkas sa miaging Martes, Enero 21 sa eskina sa M.C. Briones St. ug A.S. Fortuna St., Barangay Guizo, dakbayan sa Mandaue.
Sigon ni PMSgt. Rolando Gelido, imbestigador sa kaso ug anaa sa Mandaue City Police Office (MCPO) Traffic Group nga wala na mopasaka og kaso ang mga hingtungdan ug gi-settle nalang kini sa duha ka partido.
Nakadawat ang mga hingtungdan sa matag biktima og P25,000 isip settlement.
Giila ang duha ka biktima nga silang Gerry Boy Algones Chavez, taga Alambijud Argao, Cebu ug Jessa Paden Biola, 26, taga Barangay Laray, Talisay City.
Ang tag-iya LNK Trucking and Repair Services maoy nibayad sa gasto sa hospital ug sa lubong sa duha ka biktima.
Base sa imbestigasyon sa kapulisan nga ang drayber sa prime mover nagsubay sa first lane sa M.C. Briones St. paingon sa Maguikay flyover.
Samtang, ang motorsiklo nagsubay sa samang dalan ug niliko sa wala paingon sa A.S. Fortuna St. dihang nagbangga ang duha ka sakyanan.
Tungod sa impact, naguroy sa dan ang duha ka mga biktima samtang ang motorsiklo niini nagpabilin sa ligid sa prime mover ug nahandos ngadto sa 75 ka tiil palayo sa panagbangga.
Sama pa ni Gelido nga ang drayber sa prime mover nga si Edgar Oncenes, 50, taga Masaba, Danao City, miingon nga wala sya magdahom nga nabangga ang motor ug nagtuo nga libaong lang apan pag-break niini, nakabantay na kini nga ang motorsiklo nag-ungot na sa iyang ligid.
Ang duha ka biktima gidala sa managlahing tambalan apan, parehong gidelarar sa nga doktor nga dead-on-arrival (DOA).
“Makaingon gyud ta nga sayop gyud sa motor,” sigon ni Gelido.
Gibuhian na sa kapulisan si Oncenes human naareglo sa duha ka partida ang kaso.
Mipahimangno sab si PLtCol. Franco Rudolf Oriol, ang chief sa Traffic Group ngadto sa mga motorista nga magpalayo sa mga truck tungod limitado ra ang makit-an niini
Kung anaa sa atubangan kinihanglan 10 ngadto sa 15 ka metros ang gilay-on gikan sa truck aron makita sa drayber nga naa kini gisundan.
Kung anaa sa luyo sa truck kinahanglan nga 15 ngadto sa 20 ka metros ang gilay-on niini aron makita kini sa side mirror sa mga truck, pasidaan sa kapulisan. (KFD)