MAG-usa ka buwan nang milabay ang bagyong Ursula nga niigo sa Daanbantayan ug silingang lugar, nimando gihapon si Mayor Sun Shimura sa Daanbantayan sa community development workers (CDW) purok leaders ug barangay officials sa pagdali og subay sa kadaut sa bagyo.
Kini bahin sa kompletong listahan sa mga balay nga partially o totally damaged, apil na ang lista sa mga households nga wa makaangkon og kadaut sa bagyong Ursula.
Ang listahan kinahanglan naay pirma sa barangay kapitan aron pagmatuod nga sakto ang datos nga gipamutang sa mga CDW ug purok leaders, usa pa kini isumiter ngadto sa buhatan sa Municipal Social Welfare and Development (MSWD).
Giawhag sa mayor ang pagtinabangay sa tanan, ilabi na sa barangay level, aron matunhay ug mapadali ang paghimo sa assessment report sa kadaut sa bagyo.
Sa uwahing datos nga natala sa Provincial Disaster Risk Reduction and Management Office (PDRRMO) miabot og P17 milyunes ang danyos sa bagyo diin labing dako og kadaot nga natala ang panagatan og kaumahan.
Hinuon, ang mga mananagat sa Barangay Poblacion ug Barangay Agujo nakadawat na og mga plywood gikan sa lokal nga kagamhanan aron ma paayo ang mga naguba nilang mga sakayan tungod sa bagyong Ursula.
Gisugdan na usab ang rehabilitasyon sa mga dalan sa Sitio Pangadlawan ug Barangay Bakhawan nga naguba tungod sa bagyong Ursula.
Nakadawat na usab og nga ayuda ng 100 ka mga palid sa sin ang lungsod alang sa mga tunghaan nga natukas ang mga atop niini atol sa pagkusokuso sa bagyo niadtong miaging buwan. (ANV)