NAPASAKA na ngadto sa Cebu City Prosecutor’s Office ang kasong arson batok sa usa ka 24-anyos nga lalake nga gitumbok nga usa sa mga nakaingon sa sunog sa Barangay Luz, Siyudad sa Sugbo niadtong gabii sa Enero 13, 2020.
Dunay nakuhang mga saksi ang Cebu City Fire Department nga nagtumbok kang Ariel Lapis, 24, nagpuyo sa dapit, nga nidagan gikan sa lawak diin giingong nagsugod ang kayo.
Si Ariel anak ni Mary Ann Lapis, tag-iya sa balay diin nagsugod ang kayo nga niresulta sa pagkaugdaw sa 60 kapin ka mga balay.
Matod sa imbestigador sa Cebu City Fire Department, FO2 Fulbert Navarro, nga niadtong Martes, Enero 21, nasang-at na sa piskal ang kaso nga arson.
Gihulagway ni Navarro nga lig-on ang pamahayag sa ikatulong saksi nga wa pa nganli ni Navarro alang sa iyang seguridad.
“Nakadungog mismo ang saksi nga si Ariel didto sa sulod sa kwarto dunay gikalalis nga kauban ug miingon nga ‘unsa man ni, sunugon na lang nato ni?’ Murag nangutana sa iyang kauban nga dunay sagol kalagot base sa nadunggan sa atong saksi,” butyag ni Navarro.
Nilabay ang mga dos minutos, sila si Ariel ug mga kauban nagdinaganay pagawas sa kwarto sa suspek tungod sa pag ulbo na sa kayo.
Dugang ni Navarro nga ang unang duha ka mga saksi nga ilang naka estorya miingon nga didto nag sugod sa ikatulong andana ang pagdako na sa kayo.
Apan nasuta nga ang kwarto sa ikatulong andana nagtungod sa kwarto ni Ariel sa ikaduhang andana.
Ang gibug-aton sa pamahayag sa ikatulong saksi maoy nagtukmod sa kabomberohan nga mosang-at og kaso batok sa suspek. (BBT)