ANG Metro Pacific Tollways Corporation (MPTC) nipahibaw sa publiko nga adunay toll fee nga P85 ngadto sa P300 sa ilang unang tuig sa pag-abli sa Cebu-Cordova Link Expressway.
Kini mao ang gibutyag ni MPTC President ug CEO Rodrigo Franco.
Ang P85 nga toll fee alang kini sa Class A nga mga sakyanan nga anaay duha ka aksol ug usa ka kinatibuk-an nga gitas-on hangtod sa 7.5 ka tiil sama sa kotse, jeepney, van, pick-up, ug mga motorcycle.
Nagkantidad og P160 ang Class B nga mga sakyanan nga adunay duha ka aksol ug gitas-on nga labaw pa sa 7.5 ka mga tiil, lakip na ang Class A nga mga sakyanan nga adunay mga trailer sama sa mga bus ug truck.
Ang mga dagko nga mga trak moabot ngadto sa P300 ang toll fee.
Sigon ni Robert Uthwatt, project manager sa COWI sa nga ang kinatibuk-ang porsyento sa progreso sa mga engineering, procurement and construction anaa na sa 49.85 samtang ang proseso sa pagtukod anaa na sa 31. 64 nga porsyento.
Dungag niya nga dul-an sa 50,000 ka mga sakyanan ang makaagi sa CCLEX ug kini motaas pa sa matag tuig nga molabay.
Si Cordova Municipal Mayor Mary Therese Sitoy-Cho niingon nga dako og kaayohan ang mahatod sa ilang lungsod sa pagtukod sa maong CCLEX.
“Duol na kaayo mi sa Cebu City. Daghan na ang maka trabaho sa syudad nga dili na mag-abang sa syudad. Mag-uli-uli na lang sa among lungsod. Daghan pud nga investments nga nisulod sa among lungsod kay ang access naman gud ani ang nakuha namo sa among bridge,” saysay niya.
Dugang usab niya nga ang market value sa ilang kayutaan nisaka. Kaniadto anaa kini sa P500 matag square meter, apan karon tag P5,000 matag square meter tungod sa ikatulo nga taytayan. Ang ikatulong taytayan gitakda nga mahuman sa tungatunga sa ikatulong quarter sa sunod tuig.
Ila usab kini gihalad ngadto sa ika-500 nga tuig sa Kristiyanismo ug kini ilang gitakda nga nganlan og Santo Niño Bridge. (JCT)