TACLOBAN -- Wala pa'y klaro nga tubag ang kadagkoan sa Department of Health (DOH) sa Eastern Visayas sa giingong kaso sa 2019-novel coronvirus (2019-nCov) sa Tacloban City nga nigawas sa social media.
Nikatap sa social media nga duna'y usa ka langyaw nga gikan sa Wuhan, China nga gi-quarantine karon sa usa ka tambalanan sa Tacloban human nakitaan og sintomas sa 2019-nCov.
Ning pagbalita, giklaro sa DOH Eastern Visayas nga walay positibo nga kaso sa 2019-nCov sa lugar.
“I would like to emphasize, there is no novel coronavirus in Tacloban,” matod ni Dr. Minerva Molon, DOH Eastern Visayas Director.
Apan matod ni Molon, wala nila gihimakak ug wala usab nila gikompirmar ang report nag nigawas sa social media.
“There is a government protocol that we are following, ito is based again on the WHO (World Health Organization) issuances. We don’t also want the public to panic because of the circulating social media post,” dugang ni Molon.
Matod ni DOH Eastern Visayas spokesperson John Paul Roca, kon duna may positibo nga kaso, ang secretary of health lang ang duna'y katungdanan mosulti niini kon madawat na ang confirmatory test.
Gisiguro ni Roca nga ila ra ipahibawo sa publiko kon duna man gani magpositibo.
Gihangyo hinuon sa DOH Eastern Visayas ang publiko nga mohimo og precautionary measures. (JKDP)