MAGKOMBATI og balik ang Team LeBron ug Team Giannis sa National Basketball Association (NBA) All-Star Game nga gikatakda karong Pebrero 16 (US time) sa United Center sa Chicago, Illinois.
Kini human gipatigbabawan nila ni Los Angeles Lakers superstar LeBron James ug Milwaukee Bucks superstar Giannis Antetokounmpo ang hinakutay og mga boto gikan sa mga sumosunod sa NBA.
Sa kinatibuk-an, si James ang nakahakot sa labing daghang fan votes nga miabot og 6,275,459 aron nagpahimo kaniya’g balik nga Team Captain nga gikan sa Western Conference.
Nalabwan ni James og 163,724 votes ang batan-ong superstar sa Dallas Mavericks nga si Luka Doncic.
Sa iyang bahin, si Antetokounmpo maoy nakahakot sa labing daghang mga boto gikan sa Eastern Conference nga miabot og 5,902,286 nga nagpahimo sab kaniya’g balik nga usa ka Team Captain.
Gawas nila ni James ug Antetokounmpo, ang ubang mga napili nga starters mao sila si Doncic, Anthony Davis sa Lakers, Kawhi Leonard sa Los Angeles Clippers, James Harden sa Houston Rockets, Pascal Siakam sa Toronto Raptors, Joel Embiid sa Philadelphia 76ers, Kemba Walker sa Boston Celtics ug Trae Young sa Atlanta Hawks.
“For me, it’s always a blessing just being part of All-Star weekend,” matod ni James.
Gumikan kay siya ang nakahakot sa labing daghang mga boto sa kinatibuk-an, si James maoy unang mopili gikan sa listahan sa reserba nga mga magduduwa nga ipagawas karong Enero 30.
Kini maoy ika-16 nga higayon nga nahimong starter si James nga maoy bag-ong rekord sa NBA.
Sukad nga gisunod kining maong sestima sa All-Star Game, wala pa nakatilaw og pilde si James.
Gilupig sa Team LeBron ug Team Stephen (Curry) niadtong 2018 samtang gipukan sa Team LeBron ang Team Giannis niadtong 2019.
Sa listahan sa starters, tulo ang nahimong All-Star sa labing unang higayon. Kini mao sila si Siakam, Young ug Doncic.
Si Siakam dako og natabang sa pagkahimong kampiyon sa Toronto Raptors sa miaging season diin midaog siya sa pasidungog isip most improved player.
Sila si Young, 21, ug Doncic, 20, mao ang labing batan-on nga nahimong starters ning higayuna.
Naggunit sa rekord niini mao si Kobe Bryant, kinsa nahimong starter niadtong 1998 sa edad nga 19.
“It’s an indescribable feeling,” asoy ni Young, kinsa maoy usa sa labing sinaligan sa Hawks. “After watching and admiring all these guys in the league growing up, I am truly humbled to be in this position.” (AP, ESL)