NAGPADAYON karon ang usa ka lapad nga evangelization campaign sa Archdiocesis sa Sugbo pinaagi sa Commission on the Laity. Kini nga kampanya kabahin sa gihimong pagpangandam sa Simbahang Katoliko alang sa ika 500 ka tuig nga kasumaran sa pagka himugso sa Kristianismo sa nasod nga saulogon sunod tuig, 2021.
Mao ni ang gitawag og Pagsangyaw 2021, kansang katuyoan mao ang pagpalig-on sa pagtuo sa mga Pilipino pinaagi sa nagkadaiyang pagtolun-an. Usa na niini mao ang paghimo og mga tinuod nga sugilanon sa kinabuhi nga nabag-o tungod sa tabang sa simbahan.
Kini nga mga sugilanon gigahinan og panahon sa pagdukiduki una gipaambit ngadto sa katawhan. Usa sa mga tawo nga nagsubay, naghan-ay og apil sa tigsangyaw mao ang akong News Manager kaniadto sa ABS CBN Central Visayas nga si Rosemarie Holganza Borromeo.
Ang mga video nga ilang makuha moagi pa og makuting editing human subay sa nalatid sa production.
Ug pinaagi kang Rosemarie mapasalamaton ako nga napili nga usa sa mga tigsangyaw ubos sa Season 4 sa Pagsangyaw 2021.
Mao ni ang mga salida nga inyong makita sa TV monitor sa mga simbahan sa dili pa ang Santos nga Misa.
Sa matag salida inyong mabati ang voice over nga naghatag og kinabuhi sa mga video nga gipahaum sa nagkadaiyang sugilanon sa kinabuhi.
Gawas namo ni Rosemarie laing mga tigsangyaw mao sila si Alan Domingo ug Nikko Sereno sa GMA-7, akong mga kauban kaniadto sa ABS CBN nga sila si Rico Lucena ug Vilma Andales, Atty. Ruphil Bañoc sa DYHP, Malou Tabar ug kolumnista ug brodkaster Malou Guanzon-Apalisok.
***
Abi nako og deretso na ang biyahe sa Sinulog 2020 taliwala sa mga kontrobersiya nga nitumaw.
Diha pa gihapoy nagpabadlong nga nakahatag og mansa sa selebrasyon. Hinuon kong maghisgut ta og siguridad atong pakpakan ang atong kasundalohan ug kapulisan.
Pakpakan nato ang simbahang Katoliko ug ang gobyerno sa ilang dakong tampo sa kalampusan sa kapistahan ni Senyor Santo Niño.
Karon maoy tukma nga panahon aron sugdan ang pagpangandam sa Sinulog 2021.