SUPERBALITA CEBU

Binghay: Na HB tungod sa X

Kukabildo

NAUNDANG sa makadiyot ang annulment hearing ni Fe (tinuod ngalan gitago) kay gisunggo ug deriyot nga gidala sa tambalanan. Pag-abot sa mga medics, nahibaw-an nga na High Blood (HB) kay misaka man og kalit iyang pressure gumikan sa stress.

Sa dihang gipangutana sa nurse, iyang tubag di niya mapugngan iyang grabing kurog ug kahadlok kay nagka-atubang sila pagbalik sa iyang X unya nahibalik ang tanang ngil-ad ug dautang panghitabo lakip pang-abuso nga iyang nahi-aguman sa iyang kanhing bana.

Kining blood pressure kun hypertension mao ang gikusgon sa pagbomba sa dugo sa arteries (mga dagkong ugat sa kasing-kasing) ngadto paingon sa ubang parti sa lawas. Kung kini mosaka pag-ayo sa ulo, delikado kini sa stroke o heart attack.

Matod sa Centers for Disease and Prevention (CDC), halos usa kada tulo ka mga Amerikano sa Estados Unidos dunay High Blood (HB) pressure.

Unsa may mga simtomas kon taas ang pressure sa dugo?

Blurred o lubog nga panan-aw, brain fog, ug kuwang sa konsentrasyon. Kining HB maka-daot sa gagmay nga mga ugat nga maoy magdala sa oxygenated nga dugo paingon sa retina sa mata maong malubog ang panan-aw. Usahay maapil ang optic nerve pagka daot.

Sunod kining tumang sakit sa ulo o migraine. Kon motaas na gali ang pressure, mosaka kini sa ulo labi na ngadto sa may bagolbagol nga nagtuyok sa utok.

Pagpang-hapo o lisud sa pag-ginhawa. Kini tungod sa pagbaga o paggahi sa kuta sa kasing-kasing.

Pagbati og kasukaon ug kalipong. Kon mosaka gali ang pressure sa dugo, gamay na lang sab ang ipaguwa ini nga dugo nga maoy moapod-apod ngadto sa ubang parte sa lawas maong magpanlipong ug makasukaon.

Bation sab og tumang kakapoy ug katulugon kay magluya naman ang lawas unya di na ka lihok-lihok kayo kay gamay ra man ang dugo nga maoy nagdala og oxygen.

Sunggo o pagtulo sa dugo gikan sa ilong. Tungod sa ka kusog sa pagbomba sa dugo nga mopa-inogn sa ulo, mangita kini og kalutsan maong kasagaran ari agi sa mga gagmay nga kaugatan sa ilong.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph